बारामती, ता. ३१ : शहरात तीन दिवसांपासून नंबरप्लेटशिवाय व भरधाव, काचांना काळी फिल्म लावून फिरणाऱ्या मोटारचालकावर पोलिसांनी दंडात्मक कारवाई केली आहे.
पोलिस निरीक्षक चंद्रशेखर यादव हे २४ मे रोजी काळ्या काचा असलेल्या वाहनांवर कारवाई करत असताना भिगवण चौकातून एक काळ्या काचा असलेली गाडी भरधाव निघून गेली. पोलिसांनी थांबविण्याचा प्रयत्न करूनही ती गाडी निघून गेली. त्यानंतर सिटी इन चौकातही वाहतूक पोलिसांनी ती अडविण्याचा प्रयत्न केला, तिथेही कारचालक पोलिसांना न जुमानता निघून गेला. पुढे गांधी चौकातही हीच गाडी पोलिसांच्या इशा-यानंतरही निघून गेली. पोलिसांचा संशय बळावल्यानंतर पोलिसांनी कसून तपास केल्यानंतर कृष्णा अभिजित क्षीरसागर (रा. माऊलीनगर, प्रगतीनगर, बारामती) हा चालक गाडी चालवित असल्याचे निष्पन्न झाले. पोलिसांनी ही गाडी ताब्यात घेत त्याच्यावर दंडात्मक कारवाई केली. बेदरकारपणे गाडी चालविल्याप्रकरणी न्यायालयात खटला पाठविण्यात आला आहे.