माळेगाव कारखान्याच्या सभासदांनी दिलेला कौल मान्य आहे. मात्र, उपमुख्यमंत्र्यांना ही निवडणूक जिंकण्यासाठी सोळा सभा घ्याव्या लागल्या. आठवडाभर बसून राहावे लागले. घरोघरी जावे लागले. लक्ष्मीदर्शन द्यावे लागले. जिल्हा बँक रात्री अकरा वाजता उघडून पाकीट भरून शेतकऱ्याला पोचवावी लागतात. पैशाचे वाटप करण्याची वेळ आली. उपमुख्यमंत्री व क्रीडा मंत्र्यांना सभासदांनी गुडघ्यावर आणले, असे म्हटल्यास वावगे ठरणार नाही. उपमुख्यमंत्री माळेगावच्या निवडणुकीसाठी सत्तेचा पुरेपूर गैरवापर केला. स्वतःचा पॅनेल निवडून आणण्यासाठी त्यांना एवढा मोठा संघर्ष करावा लागला, यातच आम्ही आमचा विजय समजतो. उपमुख्यमंत्र्यांनी शब्द दिल्यानुसार सर्वाधिक भाव माळेगावच्या सभासदांना द्यावा, हीच अपेक्षा.
- रंजनकुमार तावरे, सहकार बचाव पॅनेल

‘मीच तुमच्या माळेगाव कारखान्याच्या सभासदांचे भले करू शकतो,’ या मुद्याभोवती गोल फिरलेली ही निवडणूक होती. शेवटपर्यंत सभासदांना या मुद्याच्या बाहेर पडताच आले नाही. सत्तेच्या समीकरणातून आर्थिक गणिते माझ्याकडेच आहे आणि ती गणिते मीच सोडू शकतो, असे लोकांना आत्मविश्वासाने सांगितल्याने सभासदांनी त्यावर विश्वास ठेवत पॅनेलला बहुमत दिले. मात्र, सभासदांचे खरेच भले होणार का? हे येणारा काळच ठरवेल.
- दशरथ राऊत, कष्टकरी शेतकरी पॅनेलचे प्रमुख

शेतकऱ्यांची मते लक्ष्मीदर्शन दाखवून वळवून घेतली आहेत. आमचे पॅनेल पक्षविरहीत शेतकऱ्यांच्या हितासाठी केले होते. ज्येष्ठ नेते शरद पवार यांनी आम्हाला आशीर्वाद दिले होते. त्यांच्या मार्गदर्शनाखाली कारखान्याची वाटचाल अधिक प्रभावीपणे करणे शक्य झाले असते. सभासदांना आम्ही आवाहन केले होते. सभासदांनी जो कौल दिला आहे, तो आम्हाला मान्य आहे.
- ॲड. एस. एन. जगताप, बळिराजा पॅनेलचे प्रमुख