बारामती, ता. १८ : शहरातील भिगवण रस्त्यावरी बँक ऑफ बडोदाचे मुख्य प्रबंधक शिवशंकर मित्रा (वय ४५, मूळ.रा. उत्तर प्रदेश, सध्या रा. बारामती) यांनी गुरुवारी (ता. १७) मध्यरात्री बँकेतच गळफास लावून आत्महत्या केली. या घटनेने परिसरात शोकाकूल वातावरण आहे.
आत्महत्येपूर्वी लिहून ठेवलेल्या चिठ्ठीमध्ये मित्रा यांनी नमूद केले आहे की, बँकेच्या कामाच्या अतिरिक्त दबावाला कंटाळून आत्महत्या करत आहे, माझी बँकेला विनंती आहे की कर्मचाऱ्यांवर अतिरिक्त कामाचा ताण देऊ नका, सर्वच कर्मचाऱ्यांना त्यांच्यावर असलेल्या जबाबदारीची जाणीव आहे. ते आपले शंभर टक्के योगदान देण्याचा प्रयत्न करत असतात. मी आत्महत्या पूर्णतः शुद्धीत असताना आपल्या इच्छेनुसार करत आहे. यात माझ्या कुटुंबाचा काहीही संबंध नाही. बँकेच्या कामाच्या हाय प्रेशरमुळे मी आत्महत्या करत आहे. माझी पत्नी प्रिया व मुलगी माही दोघींनीही मला माफ करावे. शक्य असेल तर माझ्या मृत्यूनंतर माझ्या दोन्ही डोळ्यांचे दान करावे.

कामाच्या ताणामुळे एका राष्ट्रीयीकृत बँकेच्या मुख्य प्रबंधकाने आत्महत्या करावी या घटनेने बारामतीत खळबळ माजली आहे. मिळालेल्या माहितीनुसार मित्रा यांनी स्वेच्छानिवृत्तीची मागणी केली होती. बँकेच्या कामाचा ताण त्यांना असहय होत होता. शेवटी या ताणाला कंटाळून त्यांनी थेट आत्महत्येचाच निर्णय घेतला. मृत्यूनंतर आपले डोळे दान करावेत असेही त्यांनी चिठ्ठीमध्ये नमूद केले होते.

मिलिंद संगई, बारामती.