बारामती, ता. २० : शहरात भटकी जनावरे, कुत्र्यांचा वावर, तसेच त्याबाबत नागरिकांच्या प्राप्त होणाऱ्या तक्रारी गांभीर्याने घेत नगरपरिषदेने बंदोबस्त करावा, त्यासाठी शहरातील विविध भागात कोंडवाड्यासाठी जागा निश्चित करून प्रस्ताव सादर करावेत, असे निर्देश उपमुख्यमंत्री अजित पवार यांनी दिले.
शनिवारी (ता. १९) उपमुख्यमंत्री पवार यांनी बारामती परिसरातील श्री सिद्धेश्वर मंदिर परिसर, दशक्रिया घाट, शारदा प्रांगण येथील विकास कामे, प्रस्तावित माळावरची देवी ते जळोची चौक चारपदरी रस्ता, जळोची कालवा पुलावरून संभाजीनगरकडे जाणारा रस्ता, कालव्या लगतची गार्डन जागा, जळोची ओढ्याशेजारील दशक्रिया घाट, दहनभूमी, दफनभूमी जागा, रुई हद्दीतील विद्या प्रतिष्ठान शेजारील दोन लहान पूल, गार्डन, स्मशानभूमी, पूर संरक्षण भिंतीच्या प्रस्तावित जागेची पाहणी केली.
यावेळी उपमुख्यमंत्री पवार म्हणाले, ‘‘कामात अडथळा आणणाऱ्यांवर पोलिसांनी कारवाई करावी. रुई- जळोची ओढा रुंदीकरणाची कामे करताना मोजणी करून त्यामध्ये अतिक्रमण असल्यास काढावीत. ओढ्याच्या दोन्ही बाजूस पूर संरक्षण भिंतीचे बांधकाम करावे. शारदा प्रांगण परिसरात उभारण्यात येणाऱ्या सीबीएसई आणि मराठी शाळेत विद्यार्थी व शिक्षकांना लागणाऱ्या पायाभूत सुविधांचा विचार करून इमारत व परिसर विकसित करा. पालखी सोहळ्यातील वारकऱ्यांसाठी सोई-सुविधांचा करून शौचालय, पाणी, विद्युत व्यवस्था ही कामे करावीत.’’

नगरपरिषदेमध्ये ग्लूटन लिटर पिकिंग मशिन दाखल
आदर पूनावाला स्वच्छ शहर उपक्रमाअंतर्गत स्वच्छतेकरिता ४ ग्लूटन लीट्टर पिकिंग मशिन देण्यात आल्या आहेत. अजित पवार यांच्या उपस्थितीत नगरपरिषदेच्या सेवेत त्या दाखल करण्यात आल्या.