बारामती, ता. १९: येथील राजमाता पुण्यश्लोक अहिल्यादेवी होळकर शासकीय वैद्यकीय महाविद्यालय व रुग्णालय येथे महाराष्ट्र राज्य परिचारिका संघटनेने विविध मागण्यांसाठी शुक्रवारी (ता. १८) बेमुदत आंदोलन सुरू केले आहे. परिचारीकांसह शनिवारीही (ता.१९) विविध घोषणा देत मागण्यांसाठी घोषणाबाजी केली.
मुंबईतील आझाद मैदान येथे १५ आणि १६ जुलै रोजी सुरू झालेल्या धरणे आंदोलनानंतर, १७ जुलै रोजी राज्यव्यापी काम बंद आंदोलन केले गेले आणि परिचारिकांनी १८ जुलैपासून बेमुदत आंदोलन सुरू करण्यात आले आहे.

परिचारिका संघटनेचे मुख्यालय लातूर, राज्यातील परिचारिकांच्या प्रलंबित आणि न्याय्य मागण्यांसाठी सातत्याने आवाज उठवत आहे. विशेषतः, सातव्या वेतन आयोगानुसार गठित मुकेश खुल्लर समितीने दिलेल्या अहवालाच्या अनुषंगाने शासनाने काही सुधारणा केल्या आहेत, मात्र परिचारिका संवर्गातील अधिपरिचारिका, परिसेविका व पाठ्यनिर्देशिका या पदांवर वेतन वाढ होत नाही, असा त्यांचा मुख्य असा आरोप आहे. त्यामुळे या वर्गातील कर्मचाऱ्यांमध्ये असंतोष वाढला आहे.
संघटनेच्या निवेदनात वेतनातील त्रुटी दूर करण्यासाठी त्वरित कार्यवाही करावी, १०० टक्के कायमस्वरूपी पदभरती व पदनिर्मिती करावी, केंद्र शासनारूपी नर्सिंग भत्ता व गणवेश भत्त्यावरील मागण्या मान्य कराव्यात, परिचारिका पदनामामध्ये सुधारणा करावी, तसेच निवासस्थानांची सोय व शैक्षणिक वेतन वाढीच्या मागण्या सरकारकडून मान्य कराव्यात, असे नमूद करण्यात आले असून, या सर्व मागण्यांवर चर्चा करायला सरकारने तत्परता दाखवावी अशी विनंती केली आहे.
परिचारिका संघटनेने नमूद केले की, मागण्यांकडे दुर्लक्ष झाल्यास रुग्णांवर उपचाराबाबत गंभीर परिस्थिती निर्माण होऊ शकते. त्यामुळे शासनाने तातडीने योग्य ती कारवाई करावी, अन्यथा आंदोलन सुरूच राहील.

13179