बारामती, ता. १ : येथील टपाल कार्यालयात अत्याधुनिक एपीटी २.० (प्रगत टपाल तंत्रज्ञान) सॉफ्टवेअर कार्यान्वित केले जाणार असल्याची माहिती अधीक्षक सु. रा. साबळे यांनी प्रसिद्धीपत्रकाद्वारे दिली.
बारामती विभागाअंतर्गत टपाल विभागाकडून एटीपी २.० सॉफ्टवेअरची अंमलबजावणी ४ ऑगस्ट पासून केली जाणार आहे. लोकांना अधिक वेगवान आणि उत्तम सेवा देण्याच्या उद्देशाने ही प्रणाली बारामतीत कार्यान्वित केली जाणार आहे. या प्रणालीच्या कार्यान्वयासाठी शनिवार (ता. २) ते सोमवार (ता. ४) पर्यंत सर्व सेवा उपलब्ध नसतील. या काळात कोणतेही आर्थिक किंवा मेल व्यवहार होणार नाहीत. पोस्टल सेवा सोमवारपासून म्हणजेच ४ ऑगस्टपासून पुन्हा कार्यान्वित होणार आहेत. चांगली सेवा प्रदान करण्यासाठी हा निर्णय घेण्यात आला असल्याचे साबळे यांनी स्पष्ट केले आहे.