बारामती, ता. ३ : परिसरातील रुई ग्रामीण रुग्णालयाचे रूपांतर ट्रामा केअर सेंटरमध्ये व्हावे, अशी मागणी बारामतीकरांकडून होत आहे. असे झाल्यास अपघातग्रस्तांना तातडीने वैद्यकीय सेवा उपलब्ध होण्यासह आर्थिकदृष्ट्या दुर्बल घटकातील रुग्णांवर शासकीय दरात उपचार उपलब्ध होतील, असेही त्यांनी सांगितले.
बारामती शहर गेल्या काही वर्षांत ‘मेडिकल हब’ म्हणून उदयास आले आहे. सिल्व्हर ज्युबिली ग्रामीण उपजिल्हा रुग्णालय, रुई ग्रामीण रुग्णालय, महिला रुग्णालय, पुण्यश्लोक अहिल्यादेवी होळकर शासकीय वैद्यकीय महाविद्यालय व सर्वोपचार रुग्णालय कार्यरत आहेत. यामध्ये वैद्यकीय महाविद्यालयात कॅज्युलिटी विभाग कार्यान्वित आहे. मात्र, अपघातग्रस्तांना आवश्‍यक असलेली तातडीची वैद्यकीय मदत उपलब्ध होत नाही. त्यासाठी स्वतंत्र ट्रामा केअर सेंटर आवश्‍यक आहे. बारामतीत ते विकसित करण्याची गरज आहे. यासाठी आवश्यक डॉक्टर्स, उपचारासाठीची यंत्रणा, शस्त्रक्रिया विभाग, अतिदक्षता विभाग, हाडांचे डॉक्टर्स यांची गरज आहे.
रुई रुग्णालयाच्या विस्तारीकरणाचे काम उपमुख्यमंत्री अजित पवार यांनी हाती घेतले आहे. या रुग्णालयाची इमारत आता पूर्णत्वाच्या मार्गावर आहे. तीस खाटांची क्षमता असलेल्या या रुग्णालयाचे आता शंभर खाटांच्या रुग्णालयात रूपांतर झालेले आहे. येथेच अपघातग्रस्तांसाठी स्वतंत्र कक्ष सुरू झाल्यास ते फायदेशीर ठरणार आहे. बारामतीच्या इतर रुग्णालयातही असा कक्ष उपलब्ध नाही. ‘एमआयडीसी’ परिसरातील कारखान्यातही काम करताना अनेकदा छोटे-मोठे अपघात होतात. त्यांच्यासाठीही रुई येथे हे केंद्र केल्यास फायदेशीर ठरू शकते.