बारामती, ता. १६ : ‘‘नुकत्याच झालेल्या पाकिस्तान विरुद्धच्या युद्धामध्ये भारतीय सैन्याने आपले लष्करी सामर्थ्य जगाला दाखवून दिले आहे. वेळप्रसंगी शत्रूला योग्य उत्तर देण्याचे सामर्थ्य भारतीय लष्करामध्ये आहे,’’ असे प्रतिपादन ज्येष्ठ नेते शरद पवार यांनी केले.
बारामतीतील विद्या प्रतिष्ठान शैक्षणिक संकुलात शरद पवार यांच्या हस्ते ध्वजवंदन झाले. त्याप्रसंगी आयोजित समारंभात ते बोलत होते. कर्नल हरमिंदर सिंह याप्रसंगी प्रमुख अतिथी म्हणून उपस्थित होते. विद्या प्रतिष्ठानचे उपाध्यक्ष ॲड. ए. व्ही. प्रभुणे, सचिव ॲड. नीलिमा गुजर, खजिनदार युगेंद्र पवार, विश्वस्त मंदार सिकची, डॉ. राजीव शहा, रजिस्टार कर्नल श्रीश कंभोज यांच्यासह अनेक मान्यवर या प्रसंगी उपस्थित होते.
शरद पवार म्हणाले, ‘‘देशाचा संरक्षण मंत्री म्हणून मला व्यक्तिगत या सर्व बाबी जवळून अनुभवता आल्या आहेत. संरक्षण मंत्री म्हणून देशाच्या सेनेला मार्गदर्शन करणं, नेतृत्व देणं ही संधी मला मिळाली होती. तीही मोठी संकटे आली, प्रश्न कितीही समोर आले तरी सैन्यदलाचे घटक देशाला संकटातून बाहेर काढण्यासाठी जे जे काही करायला लागेल, ते करण्यासाठी सज्ज असतात, याचा आपणा सर्वांना रस्ता अभिमान आहे.’’

‘सैन्यदलाचा पराक्रम प्रेरणादायी’
काश्मीरच्या खोऱ्यात पहलगाम येथील हल्ला देशावरचा हल्ला होता. पण या हल्ल्यानंतर भारतीय सेना काय आहे, हे चित्र सगळ्या जगाला आपल्या जवानांनी दाखवून दिले. केवळ चार मिनिटांमध्ये शेजारच्या राष्ट्राच्या शत्रूंचे नऊ तळ उद्‍ध्वस्त करण्याचे काम आपल्या सैन्याने करत शेजारच्या राष्ट्राला, आम्ही संघर्ष करू इच्छित नाही, पण कुणी करायचा प्रयत्न केला तर त्याला मुंहतोड जवाब दिला जाईल, हे दाखवून दिले आहे. आपल्या सैन्यदलाने केलेला पराक्रम नवीन पिढीसाठी प्रेरणादायी आहे.