बारामती, ता. २४ : नगरपरिषद प्रशासनाने अनधिकृत ठिकाणी फलक लावू द्यायचे नाही, असा निर्धार केला असून, या पुढील काळात असे फलक उभारल्यास थेट गुन्हे दाखल करण्याचा इशारा मुख्याधिकारी पंकज भुसे यांनी दिला आहे.
बारामती पोलिस विभागाच्या वतीने आयोजित शांतता समितीच्या बैठकीत शहरातील प्रमुख गणेश मंडळांच्या कार्यकर्त्यांसमोर बोलताना पंकज भुसे यांनी या बाबत माहिती दिली. उच्च न्यायालयाच्या आदेशाचे उल्लंघन करण्याचा प्रयत्न जर कोणी केला तर संबंधितांवर उच्च न्यायालयाच्या आदेशाचे उल्लंघन केल्याचा गुन्हा दाखल होणार असल्याने आता बारामतीत फलक उभारताना संबंधित व्यक्ती, फलक उभारणारी यंत्रणा या सर्वांना सजग राहावे लागणार आहे. आगामी गणेशोत्सवातही मंडळांना फलकबाजी करता येणार नाही, अशीच चिन्हे आहेत.
एकीकडे पोलिसांनी लेझर व डीजे वापराविरोधात, तर नगरपरिषद प्रशासनाने फलकबाजी विरोधात कठोर भूमिका घेण्याचा मानस जाहीर केल्याने बारामतीत या तिन्ही बाबींचा वापर करताना मंडळांच्या अध्यक्षांसह कार्यकर्त्यांनाही विचार करावा लागणार आहे. पारंपरिक वाद्यांचा वापर करावा, डिजेचा वापर टाळावा, अशा स्पष्ट सूचना पोलिस अधीक्षक संदीपसिंह गिल, अतिरिक्त पोलिस अधीक्षक गणेश बिरादार यांनी दिल्या आहेत. मुख्याधिकारी पंकज भुसे यांनी फलक व रस्त्यावर येणाऱ्या मंडपाबाबतही सूचना दिल्या असल्याने यंदाच्या गणेशोत्सवात काय चित्र राहणार याकडे नागरिकांचे लक्ष आहे.