बारामती, ता. २ : शहरातील एका शाळेजवळ एक व्यक्ती शस्त्रासह फिरत असल्याची माहिती शहर पोलिसांना मिळाल्यानंतर केलेल्या कारवाईत पोलिसांनी प्रदीप सुरेश नकाते (वय २७, रा. ऋतुसृष्टी अपार्टमेंट, प्रगतीनगर, बारामती) यास अटक केली.
पोलिसांच्या गस्ती पथकाला गोपनीय माहिती मिळाल्यानंतर पोलिस निरिक्षक श्रीशैल्य चिवडशेट्टी यांच्या मार्गदर्शनाखाली पोलिस उपनिरीक्षक सतीश राऊत, पोलिस अंमलदार अमीर शेख, दत्तात्रेय मदने व इतर पथकाने त्यास पकडून झडत घेतली असता त्याच्याकडे एक गावठी पिस्तूल, चार जिवंत काडतुसे व मॅगेझिन असा मुद्देमाल पोलिसांना सापडला. या प्रकरणी बारामती शहर पोलिसांनी गुन्हा नोंद केला आहे. न्यायालयाने आरोपीस पोलीस कोठडी दिली. चौकशीदरम्यान आरोपीने शस्त्र कोठून मिळविले यासंबंधीची माहिती पोलिसांना दिली आहे. शस्त्र पुरवठादाराचा शोध पोलिसांनी आता सुरु केला आहे.