बारामती, ता. २८ : बारामती तालुका सहकारी खरेदी-विक्री संघाच्या वतीने शनिवारी (ता. २८ ) रक्तदान शिबिराचे आयोजन करण्यात आले होते. यात ५० पेक्षा अधिक पिशव्यांचे रक्त संकलित झाले. संस्थेच्या सुभाष चौकातील मुख्य कार्यालयात हे शिबिर घेतले गेले. बारामतीतील वैद्यकीय पथकाने रक्तसंकलनाची जबाबदारी सांभाळली. प्रत्येक रक्तदात्यास प्रमाणपत्र दिले गेले. संस्थेचे अध्यक्ष ॲड. रवींद्र माने म्हणाले, ‘‘अजित पवारांनी समाजहिताचे कार्य आयुष्यभर केले. त्यांच्या स्मृती जपण्यासाठी रक्तदानासारखा उपक्रम राबविणे हीच खरी श्रद्धांजली आहे.’’ कार्यक्रमास उपाध्यक्ष नितीन देवकाते, संचालक भारत ढवाण, बाबूराव चव्हाण, उदयसिंह धुमाळ, अशोक जगताप, रमेश देवकाते, शिवाजीराव टेंगले आदी उपस्थित होते. शिबिराच्या आयोजनासाठी व्यवस्थापक नीलेश लोणकर व सर्व सेवकांनी परिश्रम घेतले.