बारामती, ता. ३ : राज्याचे उपमुख्यमंत्री अजित पवार यांच्या विमान अपघातातील निधनामुळे बारामती शहरात शोककळा पसरली आहे. या पार्श्वभूमीवर येणारी रमजान ईद साध्या व संयमी पद्धतीने साजरी करण्याचा निर्णय बारामतीतील मुस्लिम समाजाने घेतला आहे.
“ईद दरवर्षी उत्साहात साजरी होईल; मात्र अजितदादा पवार पुन्हा कधीच येणार नाहीत,” अशा भावना व्यक्त करत समाजबांधवांनी फटाक्यांची आतषबाजी, डीजे, ईद मिलन समारंभ, फ्लेक्स आदी सार्वजनिक कार्यक्रम टाळण्याचे एकमताने ठरविले आहे.
शांततेचा व सामाजिक सलोख्याचा संदेश देत ईद साजरी करण्याचे आवाहन करण्यात आले आहे. अजितदादा पवार यांनी सर्व समाजघटकांना बरोबर घेऊन विकासकामांना गती दिली. सामाजिक, शैक्षणिक व सांस्कृतिक क्षेत्रात त्यांनी भरीव योगदान दिल्याची भावना व्यक्त करत त्यांच्या स्मृतीप्रित्यर्थ हा निर्णय घेतल्याचे प्रसिद्धीपत्रकात नमूद करण्यात आले आहे.