चाकण, ता. २९ : महापुरुषांच्या नावाने काही लोक दुकानदारी करतात. जे लोक महापुरुषांच्या नावाने दुकानदारी करतात ते महापुरुषांचे आदर्श शिष्य नसतात. महापुरुषाला कोणताही धर्म नसतो. महापुरुष जाती, धर्मावर मात करतात. महापुरुषांतील सामान्य पण ओळखता आलं पाहिजे, असे मत अखिल भारतीय मराठी साहित्य संमेलनाचे माजी अध्यक्ष श्रीपाल सबनीस यांनी व्यक्त केले.
चाकण (ता. खेड) येथे रोटरी क्लब चाकण यांच्या वतीने कै. शेठ धनराजजी सांकला स्मृती व्याख्यानमालेत गुरुवारी (ता. २७) रोजी सबनीस ‘समाज प्रबोधन आणि लोकशाही’ या विषयावर बोलत होते.
पुढे बोलताना सबनीस म्हणाले, ‘‘संविधानाला जात धर्म नाही. संविधान शुद्ध आहे. संविधाना इतके शुद्ध आपण आहे का?, आपण शुद्ध जीवन जगू शकलो नाहीत. म्हणून आपणाला समाजप्रबोधनाची गरज आहे.’’
यावेळी डॉ. पल्लवी बेनके यांनी सबनीस यांच्या कार्याची ओळख करून दिली. व्याख्यानमाला कमिटीचे अध्यक्ष डॉ. अमोल बेनके, संतोष मराठे, अनुप दाडगे, इक्बाल शेख, संतोष कापुरे, मोतीलाल सांकला, अशोक सांकला, डॉ. प्रज्ञा भवारी, श्याम देशमुख, सुधीर काकडे, भगवान घोडेकर, अप्पा सोनवणे, सुभाष शिंदे आदी उपस्थित होते. सूत्रसंचालन भगवान घोडेकर यांनी केले. तर उपस्थितांचे आभार मोतीलाल सांकला यांनी मानले.