चाकण, ता. २ : निघोजे (ता. खेड) येथे कंटेनर चालकाला लुटल्याप्रकरणी दोघांना अटक केली आहे. अविनाश सुरेश मोरे (वय २०, मूळ रा. पवनानगर, ता. मावळ, सध्या रा. निघोजे), अजय तुळशीराम गवळी (वय १९, मूळ रा. मालेगाव, जि. वाशीम, सध्या रा. निघोजे), अशी अटक केलेल्या आरोपींची नावे आहेत, अशी माहिती महाळुंगे पोलिस ठाण्याचे वरिष्ठ पोलिस निरीक्षक वसंत बाबर यांनी दिली.
निघोजे येथे ३० एप्रिल रोजी रात्री पावणेबाराच्या सुमारास कंटेनरचालक रामअधिनभिलमन यादव (वय ३३, रा. उत्तर प्रदेश) हा कंटेनर घेऊन महाळुंगे बाजूकडे जात होता. त्यावेळी आरोपी कंटेनरच्या समोर उभे राहिले. त्यामुळे यादव यांनी कंटेनर बाजूला घेतला व खाली उतरले. त्यावेळी आरोपींनी त्यांना दमदाटी केली. तसेच, त्यांच्या शर्टच्या खिशातील आठशे रुपये रक्कम जबरदस्तीने काढून घेतली. तसेच, कंटेनरच्या पुढील काचेवर दगड फेकून मारले व नुकसान केले. त्यानंतर आरोपी निघून गेले.