चाकण, ता. ६ : महाळुंगे (ता. खेड) येथील एका कंपनीजवळ ५५ वर्षीय महिलेचा मृतदेह कुजलेल्या अवस्थेत गुरुवारी (ता. ६) संध्याकाळच्या सुमारास पोलिसांना आढळला. परिसरात उग्र वास सुटल्याने मृतदेहाची माहिती मिळाली. मिराबाई अप्पा केदारी (वय ५५, रा. महाळुंगे ठाकरवस्ती, ता. खेड), असे मृतदेह आढळलेल्या महिलेचे नाव आहे. या मृतदेहाची ओळख साडीवरून पटली, अशी माहिती महाळुंगे पोलिस ठाण्याचे वरिष्ठ पोलिस निरीक्षक वसंत बाबर यांनी दिली.
पोलिसांनी दिलेल्या माहितीनुसार, चाकण-तळेगाव मार्गाजवळील लुमॅक्स कंपनीजवळील एका मोकळ्या झाडे-झुडपे असलेल्या जागेत मृतदेह आढळला. महिला बेपत्ता असल्याची फिर्याद पोलिसात २६ जूनला तिच्या पतीने दिली होती. मृत्यू नेमका कशाने झाला हे कळले नाही.