चाकण, ता. १६ : नाणेकरवाडी (ता. खेड) येथे पतीने पत्नीच्या चारित्र्यावर संशय घेऊन तीच्या डोक्यात, हातावर जीवे ठार मारण्याच्या उद्देशाने लोखंडी हातोडीने मारहाण केली. या घटनेत सुरेखा आडे (वय ३०) या गंभीर जखमी झाल्या असून, त्यांच्यावर रुग्णालयात उपचार सुरू आहेत. याप्रकरणी आरोपी विश्वंभर हारजू आडे (वय ३६) याला अटक केली आहे.
याबाबत चाकण पोलिस ठाण्याचे वरिष्ठ पोलिस निरीक्षक प्रमोद वाघ यांनी माहिती दिली की, हा प्रकार बुधवारी (ता. १६) रात्री दोन ते तीनच्या सुमारास राहत्या घरात घडला. आरोपी विश्‍वंभर याने पत्नी सुरेखा हिला हातोडीने डोक्यावर, हातावर, कानावर, डोळ्यावर जबर मारहाण केली. त्यामुळे सुरेखा ही गंभीर जखमी झाली. तिच्या कानातून, डोक्यातून रक्त येत होते. जखमी अवस्थेत ती घरात पडून होती. मारहाण केल्यानंतर विश्‍वंभर फरारी झाला होता. या घटनेची माहिती शेजाऱ्यांनी सुरेखा हिच्या नातेवाइकांना दिली. या प्रकरणी सुरेखा हिचा भाऊ गजानन चव्हाण यांनी फिर्याद दिली. पोलिसांनी विश्‍वंभर याचा शोध घेऊन त्याला अटक केली.