चाकण, ता. २६ : खेड तालुक्यातील भाम, संतोषनगर येथील एका तरुणाच्या स्कॉर्पिओ मोटारीमध्ये मेफेड्रोन हा अमली पदार्थ पोलिसांना आढळून आला. याप्रकरणी पोलिसांनी संशयित आरोपी तुषार मलीभाऊ कड (वय ३०) याला ताब्यात घेऊन त्याच्यावर विविध कलमानुसार गुन्हा दाखल करून त्याला अटक केला.
याबाबत चाकण पोलिस ठाण्याचे वरिष्ठ पोलिस निरीक्षक प्रमोद वाघ यांनी माहिती दिली की, पुणे- नाशिक महामार्गावरील मेदनकरवाडी (ता. खेड) येथील चाकण ग्रँड हॉटेलसमोर गुरुवारी (ता. २४) दुपारी दीडच्या सुमारास पोलिसांनी मिळालेल्या गोपनीय माहितीनुसार गाडीची तपासणी केली. त्यावेळी गाडीत मेफेड्रॉन सापडले. याप्रकरणी पोलिसांनी तुषार कड याच्यावर विविध कलमानुसार गुन्हा दाखल केला. त्याच्याकडील सत्तर हजार रुपयाचे मेफेड्रोन व गाडी, असा सुमारे आठ लाख रुपयांचा मुद्देमाल जप्त केला.