चाकण, ता. ६ : भांबोली (ता. खेड) गावच्या हद्दीत अंडाभुर्जी चालकाकडून हप्ता देण्यास उशीर झाला या कारणावरून आरोपींनी दोघांना जबरदस्तीने गाडीत बसवून त्यांना लाकडी दांडक्याने मारहाण केली. तसेच त्यांना लोखंडी कोयत्याचा धाक दाखवून जिवे मारण्याची धमकी दिली.
याप्रकरणी आरोपी नारायण सुनील घावटे (वय २५, रा. शेलू, ता. खेड), ऋषिकेश बाळू रोकडे (वय २७, रा. भांबोली), रोशन गणपत गोगावले (वय २२, रा. कोरेगाव खुर्द), सुमीत महादेव मंडल (वय १७, रा. वराळे), अनिल शांताराम शिंदे (वय २४, रा. आडे), गणेश हिरामण लिंभोरे (वय २४, रा. शेलू) या आरोपींवर खंडणी मागणे व बेकायदा शस्त्र बाळगल्याप्रकरणी विविध कलमांनुसार गुन्हा दाखल केला आहे. दोन आरोपी घावटे व गोगावले पोलिसांच्या ताब्यात आहेत, अशी माहिती महाळुंगे पोलिस ठाण्याचे पोलिस निरीक्षक अनिल देवडे यांनी दिली.
याबाबत राहुल चव्हाण (वय २१, रा. कोळीये, ता. खेड) यांनी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, हा प्रकार शनिवारी (ता. ५) सायंकाळी साडेचार ते सहाच्या दरम्यान कोरेगाव खुर्दच्या हद्दीतील जंगलात घडला घडला. चव्हाण हा विशाल देशमुख यांच्या अंडाभुर्जी गाडीवर कामास आहे. आरोपींनी गाडामालक देशमुख यांच्याकडून अंडाभुर्जीचा व्यवसाय करायचा असेल, तर दर महिन्याला दहा हजार रुपये द्यावे लागतील, अन्यथा व्यवसाय करायचा नाही, अशी धमकी देऊन हप्ता गोळा करत होते. फिर्यादी व अंडाभुर्जी गाडा मालक देशमुख यांच्याकडून हप्त्याची रक्कम देण्यास उशीर झाल्याच्या कारणावरून आरोपींनी फिर्यादी चव्हाण यास बोलावून घेतले व त्याच्यासोबत असलेल्या तुषार सुपे या दोघांना जबरदस्तीने गाडीमध्ये बसविले. दोघांना जंगलामध्ये नेऊन चव्हाण याला जिवे ठार मारण्याच्या उद्देशाने लाकडी दांडक्याने मारहाण केली व त्याचा गळा आवळला. तसेच लोखंडी कोयत्याने जिवे मारण्याचा धाक दाखवून शिवीगाळ करून दमदाटी केली, असे फिर्यादीत म्हटले आहे.