चाकण, ता. ९ : खेड तालुक्यातील चाकण, आळंदी महाळुंगे, राजगुरुनगर या पोलिस ठाण्याच्या हद्दीत मोठ्या प्रमाणात अवैध धंदे आहेत. अवैध धंद्यातून लाखो रुपये काही लोक कमावतात. तालुक्यात मोठ्या प्रमाणात दारू, गांजा, बेकायदा शस्त्र विक्री होत आहे. तसेच मटका जुगार अड्डे, बेकायदा लॉजिंग व्यवसाय आहेत. पण हे धंदे नेमके कोणाचे आहेत? असा प्रश्न नागरिकांना पडला आहे.
चाकण औद्योगिक वसाहतीमुळे चाकण, महाळुंगे परिसराचा, तसेच इतर गावांचा मोठ्या प्रमाणात विकास झाला आहे. हा आर्थिक विकास होत असताना रहिवासी वस्ती मोठ्या प्रमाणात वाढली आहे. त्यामुळे परिसरात अवैध धंदेही वाढले आहेत. परिसरातील विविध गावात बेकायदा दारू, गांजा विक्री, मटका जुगार अड्डे, बेकायदा गॅस रिफीलिंग असे धंदे काहीजण करतात. यामध्ये काही राजकीय नेते, पदाधिकारी, कार्यकर्ते गुंतलेले आहेत. त्यातून दर महिन्याला लाखो रुपये कमविले जातात. त्यातून काही लोकांना हप्ते दिले जातात. तालुक्यात अवैध धंद्याची मोठी साखळी निर्माण झाली आहे. अवैध धंदे चालविणारे दादागिरी, गुन्हेगारी करतात. या अवैध धंद्याला काही पोलिस अधिकारी, कर्मचाऱ्यांचा, तसेच राजकीय नेत्यांचाही वरदहस्त आहे, असे नागरिकांमध्ये बोलले जात आहे.
तालुक्यातील अवैध धंद्यांबाबत आमदार बाबाजी काळे यांनी विधानसभेत प्रश्न उपस्थित केला होता. अवैध धंद्यावर कारवाई करा अशी मागणी त्यांनी केली. तसेच पोलिसांवरही ताशेरे ओढले. हप्ते वसुलीत काही राजकीय नेते कार्यकर्ते पदाधिकारी, तसेच सोशल मीडियावरील तथाकथित प्रतिनिधी गुंतले आहेत, असा दावा त्यांनी केला. काही प्रशासनातील लोकही यात गुंतले आहेत. अवैध धंद्यामुळे कायदा सुव्यवस्था बिघडत आहे, असा आरोप आमदार काळे यांचा आहे.

कारवाई गरजेची मात्र होत नाही
तालुक्यात विशेषतः चाकण महाळुंगे, भांबोली, कुरुळी, निघोजे, मोई परिसरात अवैध धंद्यांना मोठ्या प्रमाणात ऊत आला आहे. हे अवैध धंद्दे काही राजकीय नेते, कार्यकर्ते, पदाधिकारी, काही गुन्हेगार चालवतात. त्यातून लाखो रुपये कमावतात हे वास्तव आहे. पण यांना कोण आश्रय देते? हा एक प्रश्न महत्त्वाचा आहे. अवैध धंद्यावर पिंपरी- चिंचवड पोलिस आयुक्तांनी आदेश देऊन सरसकट कारवाई केली पाहिजे. अवैध धंदे चालविणारे बडे मासे शोधून त्यांच्यावर कारवाई केली पाहिजे. पण तसे होताना दिसत नाही, हे मात्र खरे आहे, असे नागरिकांचे म्हणणे आहे.