चाकण, ता. १० : चाकण नगरपरिषदेच्या कर विभागामार्फत सर्व मालमत्तांचे देयक वाटप युद्धपातळीवर सुरू आहे. नगरपरिषदेचे कर्मचारी वार्डनिहाय प्रत्यक्ष घरोघरी जाऊन मालमत्ता कर बिले वितरित करत आहेत, अशी माहिती मुख्याधिकारी डॉ. अंकुश जाधव यांनी दिली.
चाकण नगरपरिषद ‘ब’ वर्गातील असून, तिच्या हद्दीमध्ये सुमारे २७ हजारांहून अधिक निवासी, अनिवासी आणि औद्योगिक स्वरूपाच्या मालमत्ता आहेत. काही मालमत्ता मिश्र स्वरूपाच्या असून, नगरपरिषदेचा मुख्य आर्थिक आधार मालमत्ता कर व पाणीपट्टी या करांवर आधारित आहे.
नगरपरिषदेच्या हद्दीत निवासी व अनिवासी मालमत्तांची संख्या अधिक असून, औद्योगिक मालमत्तांची संख्या तुलनेने कमी आहे. सन २०१७- १८ या काळात सर्व मालमत्तांचे सर्वेक्षण केले होते. त्याआधारे सन २०२२- २३ ते २०२५- २६ या कालावधीसाठी चतुर्थ वार्षिक कर आकारणी करून मालमत्तांचे भाडेमूल्य व करयोग्य मूल्य निश्चित करत बिले वाटप करण्यात आली होती. मात्र, मागील वर्षी राज्य शासनाने या कर आकारणीला स्थगिती दिल्याने २०२४- २५ व २०२५- २६ या आर्थिक वर्षांसाठी ग्रामपंचायत दरानुसारच कर आकारणी करण्यात येत आहे.

सर्व मालमत्ता धारकांनी ३१ जुलै २०२५ पूर्वी आपला कर भरल्यास त्यांना एक टक्क्याची सवलत मिळणार आहे. मात्र, ३१ डिसेंबरपूर्वी कर न भरल्यास एकूण कर रकमेवर दोन टक्के शास्ती आकारली जाणार आहे. त्यामुळे नागरिकांनी वेळेत कर भरून सूट मिळवावी, असे आवाहन मुख्याधिकारी डॉ. अंकुश जाधव यांनी केले आहे.