चाकण, ता. २७ : येथील औद्योगिक वसाहत व पुणे- नाशिक महामार्ग, चाकण- तळेगाव, चाकण- शिक्रापूर या मार्गांवरील वाहतूक कोंडीबाबत उपमुख्यमंत्री अजित पवार संबंधित सर्व विभागांच्या अधिकाऱ्यांना बरोबर घेऊन पुढील आठवड्यात पाहणी करणार आहेत, अशी माहिती खेडचे माजी आमदार दिलीप मोहिते यांनी दिली.
चाकण (ता. खेड) औद्योगिक वसाहतीतील वाहतूक कोंडी दिवसेंदिवस जटिल होत चालली आहे. वाहतूक कोंडीला अक्षरशः सारेच कंटाळले आहेत. मार्गांची मोठ्या प्रमाणात दुरवस्था झाली आहे. कामगारांचे अपघात होत आहेत. याकडे संबंधित प्रशासनाचे व राजकीय नेत्यांचे दुर्लक्ष आहे, असा आरोप नागरिक, कामगार, उद्योजक, ट्रॅफिक मुक्त चाकण कृती समिती यांचा आहे. समाज माध्यमावरही असे आरोप केले जातात.
याबाबत दिलीप मोहिते यांनी सांगितले की, मी याबाबत उपमुख्यमंत्री अजित पवार यांच्याशी चर्चा केलेली आहे. चाकणच्या वाहतूक कोंडीची त्यांना कल्पना दिलेली आहे. त्यांनी, चाकणच्या वाहतूक कोंडीचा एक यक्ष प्रश्न आहे. हा प्रश्न सोडविण्यासाठी राष्ट्रीय राजमार्ग प्राधिकरण (एनएचएआय), सार्वजनिक बांधकाम विभाग, एमआयडीसीचे अधिकारी, पीएमआरडीएचे अधिकारी, पोलिस यंत्रणा व इतर अधिकारी यांना बरोबर घेऊन चर्चा करणार आहे व योग्य मार्ग काढणार आहे,’ असे सांगितले.
भोसरीचे आमदार महेश लांडगे म्हणाले, ‘‘चाकणची वाहतूक कोंडी ही जटील आहे. ती सोडविण्यासाठी मी मुख्यमंत्री देवेंद्र फडणवीस यांना भेटणार आहे. त्यांच्याशी याबाबत चर्चा करणार आहे.’’

मिम्स व्हायरल
चाकण येथील वाहतूक कोंडीचा प्रश्न सोडविण्यासाठी पुणे- नाशिक महामार्ग चाकण तळेगाव, चाकण- शिक्रापूर या मार्गाची कामे होण्यासाठी अनेकांनी केंद्रीय मंत्री नितीन गडकरी यांनाही निवेदन दिलेली आहेत. उपमुख्यमंत्री अजित पवार यांनाही निवेदने दिलेली आहेत.या निवेदनाची मिम्स समाजमाध्यमावर व्हायरल होत आहे.