चाकण, ता. ३ : महाळुंगे इंगळे (ता. खेड) येथील काही उद्योगधंद्यांनी घातक रासायनिक विषारी सांडपाणी नाल्यात, मोकळ्या जागेत सोडल्याने एका मेंढपाळाच्या १८ मेंढ्यांचा वेदनादायक मृत्यू झाला आहे. या घटनेमुळे मेंढपाळाला तब्बल अडीच लाख रुपयांचे आर्थिक नुकसान झाले आहे. महाळुंगे इंगळे एमआयडीसी पोलिसांनी एचपी चौकातील काही कंपन्यांच्या प्रशासनावर पर्यावरण संरक्षण अधिनियम व पाणी प्रदूषण प्रतिबंध कायद्यानुसार गुन्हा नोंदविला आहे.
बाळू कोकरे (वय ४०, मूळ रा.शिरापूर, ता. पारनेर, जि. अहिल्यानगर) यांनी फिर्याद दिली आहे. बाळू कोकरे हे सोमवारी (ता. १) सायंकाळी साडेचारच्या सुमारास चाकण-तळेगाव मार्गावरील एचपी चौकाजवळील पाठीमागील बाजूस महाळुंगे गावच्या हद्दीतील विठ्ठल-रुक्मिणी देवस्थानच्या मोकळ्या जागेत नाल्याच्या बाजूला मेंढ्या चारत होते. त्या नाल्यात व बाजूला काही कंपन्यांमधून रासायनिक सांडपाणी येते. त्या घातक रासायनिक सांडपाण्यामुळे मेंढपाळाच्या १८ मेंढ्या यामध्ये १७ मादी व एक नर मेंढा ते घातक रासायनिक पाणी प्राशन केल्यामुळे त्यांच्या नाका तोंडातून पांढरा फेस व पाणी बाहेर आले. त्यामुळे त्यांचा मृत्यू झाल्याचे फिर्यादीत नमूद केले आहे, अशी माहिती महाळुंगे पोलिस ठाण्याचे वरिष्ठ निरीक्षक दिगंबर सूर्यवंशी, उपनिरीक्षक अनिस मुल्ला यांनी दिली.

घातक पाणी सोडणाऱ्या कंपनांवर कारवाई करणार
कंपन्या मोकळ्या जागेत, नाल्यात सांडपाणी सोडतात त्यांची चौकशी सुरू आहे. याबाबत पाण्याचे नमुने महाराष्ट्र प्रदूषण नियंत्रण मंडळाला पाठवण्यात आलेले आहे. त्यानंतर कोणत्या कंपन्या हे प्रदूषित, घातक पाणी सोडतात त्यांच्यावर कारवाई केली जाईल, असे वरिष्ठ पोलिस निरीक्षक दिगंबर सूर्यवंशी, तपासी अधिकारी अनिस मुल्ला यांनी सांगितले.