चाकण, ता.१४ : येथील औद्योगिक वसाहतीत विविध कंपनीतील कामगारांना एका पगारा एवढा २० ते ३० हजार तसेच ५० हजार रुपये दिवाळी बोनस जाहीर झाला आहे. कामगारांना ८.३३ टक्के तसेच २० टक्क्यांपर्यंत कंपन्यांनी बोनस दिलेला आहे. त्यामुळे कामगार वर्ग आनंदात आहे, असे कामगारांचे म्हणणे आहे.
चाकण (ता. खेड) येथील औद्योगिक वसाहतीत सुमारे पाच लाखांपेक्षा अधिक कामगार काम करतात. औद्योगिक वसाहतीत देशातील तसेच बहुराष्ट्रीय कंपन्या मोठ्या प्रमाणात आहेत. सुमारे १० हजारांवर कंपन्या आहेत. यामध्ये छोट्या कंपन्यांचे प्रमाणही मोठे आहे. यामध्ये हंगामी कामगारांची संख्या सुमारे तीन लाख आहे. हंगामी कामगारांना एका पगाराएवढा २० ते ३० हजार रुपये बोनस देण्यात आला आहे. कामगारांना बोनस मिळावा यासाठी कंपन्यांतील कामगार संघटना तसेच व्यवस्थापन यांच्यामध्ये करार होतात, करारानुसार बोनस दिला जातो. या बोनसमुळे कामगारांची दिवाळी आनंदात साजरी होणार आहे.
चाकण औद्योगिक वसाहतीत बहुतांश राज्यातील तसेच परराज्यातील कामगार वर्ग मोठ्या प्रमाणात काम करतो. यामध्ये कायमस्वरूपी कामगारांची संख्याही कमी आहे. तसेच हंगामी कामगारांची संख्या विविध कंपन्यांत अधिक आहे. कामगारांचा बोनस दसरा झाल्यानंतर दिवाळीच्या अगोदर दिला जातो. त्यामुळे कामगार वर्ग सध्या बोनस मिळाल्याने दिवाळीसाठी खरेदी करत आहे. बहुतांश कामगार दिवाळीच्या सणासाठी मूळ गावी जातो. दिवाळीचा सण साजरा करण्यासाठी मूळगावी जाण्या अगोदर तो येथील स्थानिक चाकण बाजारात तसेच पिंपरी-चिंचवड परिसरातील बाजारात विविध वस्तूंची खरेदी करतो. यामध्ये कापड, सोन्याचे दागिने व इतर घरगुती खरेदी, दिवाळीचे पदार्थ, ड्रायफूट यांची खरेदी मोठ्या प्रमाणात होते. त्यामुळे बाजारात आर्थिक उलाढाल मोठी होते. त्यामुळे कामगारांच्या दिवाळीच्या बोनसवर बाजारातील उलाढाल ही मोठ्या प्रमाणात अवलंबून आहे.

बहुतांश कंपन्यांत दिवाळीचा बोनस दिलेला आहे. एकंदरीत यावर्षी बोनसचे प्रमाणही चांगले आहे. त्यामुळे कामगारांची दिवाळी आनंदात साजरी होणार आहे. हंगामी कामगारांनाही बोनस देण्यात आलेला आहे.
- जीवन येळवंडे, अध्यक्ष, स्वाभिमानी श्रमिक कामगार संघटना, चाकण (ता. खेड)