चाकण, ता. २१: चाकण व परिसरातील गावात ऑक्टोंबर हिटमध्ये प्रथमच वळवाचा पाऊस झाला. सुमारे अर्धा तासावर पाऊस झाला त्यामुळे काही ठिकाणी पेरणी झालेल्या शेतांमध्ये पाणी साचले. पावसाचा जोर वाढल्याने ओढ्यातून, नाल्यातून पाणी वाहत होते.
चाकण शहरात पावसाने विक्रेत्यांची तारांबळ उडाली. रस्त्यावर पाणी आले त्यामुळे पथारीवाले, हातगाडीवाले विक्रेते यांची ऐन दिवाळीच्या सणांमध्ये धांदल उडाली.
चाकण परिसरातील गावांच्या शेतात नुकतीच पेरणी झाली होती. त्या शेतात मोठ्या प्रमाणात पाणी साचल्याने उगवणी व्यवस्थित होणार नसल्याचे तसेच उगवणीला बाधा येईल, असे शेतकऱ्यांनी सांगितले. शेतकऱ्यांनी सोयाबीनच्या काढणीनंतर पेरणीपूर्व मशागती केलेल्या आहेत .काही ठिकाणी रब्बी हंगामातील ज्वारी व इतर पिकांची पेरणी केलेली आहे. काही शेतात लसणाची लागवड ही करण्यात आली आहे. त्यामुळे हा पाऊस काही शेतकऱ्यांना लाभदायक ठरला तर काही शेतकऱ्यांना मात्र नुकसानकारक ठरला असे शेतकऱ्यांनी सांगितले.

09573