चाकण,ता.१७ : राज्यात कांद्याचे भाव घसरले आहेत अगदी ८ ते १५, १८ रुपये प्रति किलोला कांद्याचे भाव आहेत. त्यामुळे शेतकऱ्यांचे मोठ्या प्रमाणात आर्थिक नुकसान होत आहे. देशांतर्गत कांद्याचे भाव वाढत नाहीत हे चित्र आहे.सध्या कांद्याची निर्यात दुबई, मलेशिया, सिंगापूर, इंडोनेशिया या देशांत होत आहे. कांद्याची निर्यात बांगलादेश, श्रीलंका या देशात होत नसल्याने कांद्याचे भाव घसरत आहे. पुढील काळात या दोन्ही देशांत कांद्याची निर्यात होऊ शकते, असे व्यापाऱ्यांचे म्हणणे आहे. त्यामुळे कांद्याच्या देशांतर्गत भावात सुधारणा होईल, अशी आशा शेतकरी, व्यापाऱ्यांना आहे.
बांगलादेशमध्ये कांद्याचे दर वाढल्याने भारतातून कांदा आयातीला परवानगी दिली जाणार असल्याची शक्यता वर्तवली जात आहे. बांगलादेशच्या वाणिज्य सल्लागारांनीही दर चढे राहिल्यास आयातीचा विचार केला जाईल असे संकेत दिले आहेत. त्यामुळे काही व्यापाऱ्यांनी, निर्यातदार कंपन्यांनी ‘लेटर ऑफ क्रेडिट’ (LC) घेऊन निर्यातीची तयारी सुरू केली आहे. भारताच्या सीमेवरून काही कांद्याचे ट्रक बांगलादेशात कांदा विक्रीसाठी जात आहेत. बांगलादेशात पुढील काळात मोठ्या प्रमाणात निर्यात सुरू झाली तर देशातील कांदा बाजारपेठेवर परिणाम होणार आहे. त्यामुळे देशांतर्गत कांद्याच्या भावात प्रति किलोला २ ते ३ रुपयांची वाढ होणार आहे. पावसाने उघडीप दिल्यानंतर महाराष्ट्र व कर्नाटकातील पावसाळी कांदा विक्रीसाठी बाजारात दाखल होणार आहे. त्यामुळे पावसाळी कांद्याची आवकही वाढणार आहे. कांद्याची निर्यात बांगलादेश, श्रीलंका या देशात पुढील काळात झाली तर कांद्याचे भाव वाढतील अशी शक्यता व्यापाऱ्यांनी वर्तवली आहे.

‘‘सध्या कांद्याची निर्यात दुबई, सिंगापूर, मलेशिया, इंडोनेशिया या देशात होत आहे. कांद्याची निर्यात पुढील काळात बांगलादेश, श्रीलंका या देशात झाली तर कांद्याचे भाव प्रति किलोला वाढतील. जागतिक पातळीवर कांद्याचा पुरवठा मोठ्या प्रमाणात आहे तर मागणी कमी आहे, त्यामुळे अर्थशास्त्रीय नियमानुसार कांद्याचे भाव घसरले आहेत. कांद्याची निर्यात वाढत गेली तर कांद्याचे भाव वाढतील,’’ असे चाकण येथील कांदा बाजारातील व्यापारी माणिक गोरे, विक्रम शिंदे यांनी सांगितले.