चाकण, ता.६ : कडाचीवाडी ता. खेड येथील चाकण शिक्रापूर मार्गावर गणपती मंदिराजवळ एका आरोपीला बेकायदा पिस्तूल व एक जिवंत काडतूस बाळगल्या प्रकरणी तसेच एका तडीपार केलेल्या आरोपीला लोखंडी कोयता बाळगल्याप्रकरणी पोलिसांनी आरोपीकडील पिस्तूल, जिवंत काडतूस व लोखंडी कोयता जप्त करून त्यांना अटक केली आहे. सुमारे ५० हजार रुपये किमतीचा पिस्तूल, एक हजार रुपये किमतीचे जिवंत काडतूस व एक पाचशे रुपये किमतीचा लोखंडी कोयता असा सुमारे ५१,५०० रुपये किमतीचा मुद्देमाल जप्त करण्यात आला आहे, अशी माहिती चाकण पोलिस ठाण्याचे वरिष्ठ पोलिस निरीक्षक संजय सोळंके यांनी दिली.
चाकण शिक्रापूर मार्गावर काल शुक्रवारी (ता. ५) सायंकाळी साडेपाचच्या सुमारास कडाचीवाडी गावच्या हद्दीत गणपती मंदिराजवळ आरोपी वैभव सुरेश माने (वय २९ , रा .दत्तनगर चिंचवड, पुणे) याने बेकायदा देशी बनावटीचे पिस्तूल व एक जिवंत काडतूस बाळगलेले असताना पोलिसांना आढळून आला तसेच त्याच्याबरोबर तडीपार आरोपी अल्बर्ट सायमन जोसेफ (वय २५ रा. एम. बी. कॅम्प देहूरोड ता. हवेली) हा आरोपी त्याला तडीपार केलेले असताना सुद्धा तडीपार आदेश रद्द किंवा निवासस्थानी येण्याची परवानगी न घेता जाणून-बुजून या आदेशाचे उल्लंघन त्याने केले आहे. आरोपी अल्बर्ट याने त्याच्याजवळ एक लोखंडी कोयता बाळगला होता. या दोघांना पोलिसांनी ताब्यात घेतले. दरम्यान, फिर्याद गुन्हे शाखेचे पोलिस शिपाई ज्ञानेश्वर गाडेकर यांनी दिली आहे.