चाकण, ता. १४ : शिवाजीनगर-नाशिक एसटी बसमधील महिला प्रवाशाचे पाच लाख २० हजारांचे सोन्याचे दागिने तीन अनोळखी महिलांनी चोरून नेले. मोशी ते खेड दरम्यान ३० जानेवारीला ही घटना घडली असून, याप्रकरणी चाकण पोलिस ठाण्यात गुन्हा दाखल करण्यात आला आहे.
संगीता मोहन जाधव (वय ५५, रा. कडूस, ता. खेड) यांनी याप्रकरणी फिर्याद दिली आहे. पोलिसांनी सांगितले की, संगीता जाधव या पती, सून आणि नातीसह भोसरी येथून एसटीने गावी जात होत्या. मोशी येथे तीन महिला दोन लहान मुलांसह बसमध्ये चढल्या. त्यातील एका महिलेने संगीता यांच्याकडे लहान मूल दिले आणि त्यांना हातातील बॅग खाली ठेवण्यास सांगितले. दुसरी महिला गप्पा मारून संगीता यांचे लक्ष वेधत असताना, खाली बसलेल्या दोन महिलांनी बॅगेतील दागिने लंपास केले, असे तक्रारीत नमूद केले आहे. याप्रकरणी शुक्रवारी (ता. १३) ऑनलाइन तक्रार नोंदविण्यात आली. वरिष्ठ पोलिस निरीक्षक जितेंद्र कदम यांच्या मार्गदर्शनाखाली चाकण पोलिस पुढील तपास करत आहेत.