चाकण, ता. १८ : अवघ्या काही दिवसांवर होळी सण आल्याने राज्यात सर्वत्र होळीच्या तयारीला वेग आला आहे. गोवऱ्यांना मागणी वाढली आहे. पारंपरिक पद्धतीने होळी पेटवण्यासाठी शेणाच्या गोवऱ्यांचा प्रामुख्याने वापर केला जातो. त्यामुळे ग्रामीण भागासह शहरी भागातही गोवऱ्यांची खरेदी मोठ्या प्रमाणात होते. काही शेतकरी गावातून गोवऱ्या शहरात विक्रीसाठी नेतात.
होळी दहनासाठी लाकूड, शेणाच्या गोवऱ्या तसेच इतर पूजासाहित्य वापरले जाते. यंदा गोवऱ्यांचे दर वाढले आहेत. शेकडा गोवऱ्या पाचशे ते एक हजार रुपयाला मिळतात. एका गोवरीची किंमत पाच ते दहा रुपये आहे. वाढती मागणी, वाहतूक खर्च, जनावरांच्या चाऱ्याचा वाढता खर्च, गोवऱ्या थापण्याचा खर्च यामुळे किमतीत वाढ झाल्याचे शेतकऱ्यांचे म्हणणे आहे. ग्रामीण भागातील शेतकरी महिलांसाठी शेणाच्या गोवऱ्या थापून त्या वाळवून विकणे हा शेतीला पूरक जोड धंदा ठरत आहे. काही ठिकाणी ऑनलाइन ऑर्डरची सुविधाही काही व्यवसायिकांकडून, गोठे मालकांकडून उपलब्ध करण्यात येते.
पर्यावरणपूरक सण साजरा करण्याच्या दृष्टीने शेणाच्या गोवऱ्यांचा वापर अधिक योग्य मानला जातो. लाकडाच्या तुलनेत गोवऱ्यांमुळे कमी प्रमाणात झाडांची तोड होते. प्रदूषणही तुलनेने कमी होते असे पर्यावरणप्रेमींचे मत आहे. त्यामुळे शेणाच्या गोवऱ्यांचा वापर दिवसेंदिवस वाढला आहे.