चाकण, ता. २७ : बिलाचे पैसे मागितल्याने काळूस (ता. खेड) येथील अक्षय किसन डुंबरे (वय २२) यास आठ जणांनी लाथाबुक्क्यांनी तसेच हॉकीस्टिकने मारहाण केली. याप्रकरणी आठ जणांवर गुन्हा दाखल. ग्रामपंचायतीच्या जवळील रस्त्यावर ही घटना रविवारी (ता.२७) घडली.
मारहाणप्रकरणी अक्षय डुंबरे याने फिर्याद दिली. दरम्यान, भांडणे सोडविण्यासाठी आलेल्या एकाला मारहाण केली. आरोपी पळून जात असताना फिर्यादीचे वडील किसन डुंबरे यांनी त्यांची मोटार थांबवण्याचा प्रयत्न केला. त्यावेळेस किसन यांना मोटारीच्या बॉनेटवर घेऊन साधारणपणे १०० फूट ओढत नेले. यामुळे ते जखमी झाले, अशी माहिती चाकण उत्तर पोलिस ठाण्याचे वरिष्ठ पोलिस निरीक्षक जितेंद्र कदम यांनी दिली.
याप्रकरणी आरोपी अमोल आवटे, अजय बवले, निखिल खैरे, सत्यवान म्हसाडे, मारुती गव्हाणे व त्यांचे दोन ते तीन मित्र अशा आठ जणांवर गुन्हा दाखल केला आहे.
सत्यवान म्हसाडे याच्याकडे अक्षयने कामाच्या बिलाचे पैसे मागितले होते. त्यामुळे आरोपींनी त्यास मारहाण केली. भांडणे सोडविण्यासाठी आलेल्या शेखर पोटवडे यालाही आरोपींनी हॉकी स्टिकने मारहाण केली. दरम्यान, या मारहाणीचे सीसीटीव्ही चित्रीकरण पोलिसांना मिळाले आहे.