चास, ता.२७ : आरोग्यासाठी परिपूर्ण असणाऱ्या रानभाज्यांची माहिती सर्वसामान्य व शहरी भागात राहणाऱ्या नागरिकांना व्हावी व वर्षातून एकदा तरी या भाज्यांचा आपल्या आहारात समावेश व्हावा. या भावनेतून रानभाज्यांचा महोत्सव साजरा केला आहे, अशी माहिती जनजाती कल्याण आश्रम पुणे ग्रामीणचे अध्यक्ष संभाजी पारधी यांनी दिली.
भोमाळे (ता. खेड) येथे रविवारी (ता. २५) रानभाजी महोत्सवात पारधी बोलत होते. जनजाती कल्याण आश्रम पुणे ग्रामीण यांच्या माध्यमातून भीमाशंकर अभयारण्याच्या कुशीत वसलेल्या भोमाळे येथे रोजी रानभाज्या महोत्सवाचे आयोजन करण्यात आले होते. या महोत्सवात सुमारे बावीस प्रकारच्या भाज्या तयार करून ठेवण्यात आल्या होत्या. यामध्ये डांगर भोपळा, गोमठी, कर्टूली, चयताती भाजी, कोकम, कांडे चित्रूक, शेवाळी, बामणी आळींब, कडकिंद, रानकेळी, कसूर, कुरडू, गवती कावळी, काटेसवार, घोटवेल, चिचूर्डे, पाथरी, भारंगी, पाथवड या रानभाज्यांचा समावेश होता.

महोत्सवाचे उद्‌घाटनप्रसंगी अरुण काठे, विशाल भुरूक, विजय भालिंगे, विनायक खांडे, पुणे महानगर उपाध्यक्ष तुषारिका लिईमे, उपसरपंच अनिता सावंत, सतिष मोकाशी, मंगेश पारधी, कैलास भालेकर, केशव कडाळे, रेखाताई मराडे, शिवाजी मराडे, शंकर गोडे, दामू कावळे, अरुण काठे, रामदास भारमळ, शिवाजी चौरे, अशोक भवारी, लीलाताई मोडक, पुनाजी बुळे, उमेश ढमाले, स्वप्नील शिर्के यांसह अनेक मान्यवर उपस्थित होते.
या महोत्सवात संतोषी माता महिला बचत गट, वसरसुबाई महिला बचत गट, रमाई महिला बचत गट, दुर्गामाता महिला बचत गट, कळमजादेवी महिला बचत गट, श्री भैरवनाथ महिला बचत गट यांसह भोमाळे व परिसरातील ७० महिलांनी सहभागी होत रानभाज्या तयार करून आणल्या होत्या.
रामदास भारमळ यांनी सूत्रसंचालन तर शिवाजी चौरे यांनी आभार मानले.
02557