चास, ता. ४ ः खेड तालुक्याच्या पश्चिम पट्यातील शिरूर- भिमाशंकर मार्गावरील धुओली (ता. खेड) गावाजवळ रस्त्याखालून टाकलेली जलवाहिनी तुटल्याने रस्ता खचून मोठा खड्डा पडला आहे. हा खड्डा अपघाताला आमंत्रण देत असून, आत्तापर्यंत अनेक दुचाकीस्वार या खड्यात पडले आहेत. हा खड्डा तातडीने दुरुस्तीची मागणी वाहनचालक व नागरिक करीत आहेत.
हा मार्ग रहदारीचा असून, या मार्गावर पर्यटकांसह श्री क्षेत्र भीमाशंकरला जाण्यासाठी वाहनांची नेहमीच गर्दी असते. या मार्गावरील धुओली गावाच्या हद्दीत साइड गटरामधील पाणी रस्त्याच्या पलीकडील बाजूस जाण्यासाठी टाकलेली जलवाहिनी रस्त्याच्या दोन्ही बाजूस तुटल्याने रस्ता खचून मोठा खड्डा पडला आहे. या खड्यात आत्तापर्यंत अनेक वाहनचालक पडले असून, चारचाकी वाहनांचे नुकसान झाले आहे. या खड्यावरून हायवासारखे मोठे वाहन गेल्यास रस्ता पूर्ण खचून या रस्त्यावरील वाहतूक ठप्प होऊ शकते. वाहतूक ठप्प झाल्यास जवळपास १० ते १२ गावांचा तालुक्याशी संपर्क पूर्णपणे तुटणार आहे.
या बाबत सार्वजनिक बांधकाम विभागाचे अभियंता अजिंक्य शिंदे यांच्याशी संपर्क केला असता त्यांनी सांगितले की, ‘‘या खड्ड्याची पाहणी केली असून, हा मार्ग हा राष्ट्रीय महामार्गाकडे हस्तांतरित केलेला असल्याने दुरुस्तीची तरतूद आमच्याकडे नाही. मात्र, वाहनचालकांचा होणारा त्रास लक्षात घेऊन तातडीने येथील वाहिनी बदलून वाहतूक सुरक्षित व सुरळीत करण्यात येईल.

03786