चास, ता. ५ : गणेशोत्सव काही दिवसांवर आल्याने मूर्तींवर रंगाचा अखेरचा हात फिरवण्यासाठी मूर्तिकारांची लगबग सुरू आहे. पावसाने उसंत घेतल्याने कामाला वेग आला असून, गेल्या वर्षीच्या तुलनेत यंदा मूर्तींच्या किमतीत २० ते २५ टक्के वाढ झाल्याचे वाडा (ता. खेड) येथील मूर्ती कारागीर मंगेश सोमवंशी यांनी सांगितले.
मूर्तिकार सहा महिने आधीपासून तयारी करतात. प्लॅस्टर ऑफ पॅरिसच्या मूर्ती वाळण्यासाठी ऊन आवश्यक असते. यंदा पावसाने उघडीप दिल्याने मूर्ती वेगाने तयार होत आहेत. कच्च्या मालाच्या दरवाढीमुळे मूर्तींच्या किमतीही वाढल्या आहेत. पंधरा दिवसांपूर्वीच्या संततधार पावसामुळे मूर्ती वेळेत पूर्ण करण्याचे आव्हान होते, मात्र आता हवामान अनुकूल आहे.
मंगेश सोमवंशी, तृप्ती सोमवंशी, श्रृती पानसरे, ज्योती कदम यांनी सांगितले की, यंदा भक्तीमय मालिकांमधील पात्रांच्या रूपातील मूर्तींना मोठी मागणी आहे. यात खंडोबा रूप, घोड्यावरील गणेशमूर्ती, साईबाबा रूप आणि बैलगाड्यावरील मूर्तींचा समावेश आहे. तरीही लालबागचा राजा आणि दगडूशेठ हलवाई रूपातील मूर्तींची क्रेझ कायम आहे. राजगुरुनगरच्या तुलनेत वाडा, कडधे, चास या ग्रामीण भागात किमती कमी असल्याने शहरातील नागरिक ग्रामीण भागातून मूर्ती खरेदीला प्राधान्य देत आहेत.