खोडद, ता. २१ : शिक्षक पदभरतीपूर्वी जिल्हाअंतर्गत बदली प्रक्रिया राबवून दिव्यांग, गंभीर आजारी, पती-पत्नी एकत्रीकरण व अवघड क्षेत्रात कार्यरत शिक्षकांना न्याय द्यावा, अशी मागणी जुन्नर तालुका शिक्षक समितीचे अध्यक्ष राजेश दुरगुडे यांनी केली आहे.
शालेय शिक्षण विभागाच्या आदेशानुसार यापुढे जिल्हाअंतर्गत बदल्या होणार नाहीत. त्यामुळे शेवटची संधी म्हणून शिक्षक भरतीपूर्वी समुपदेशन पद्धतीने रिक्त जागेवर विनंती बदल्या करा, अशा सूचना ग्रामविकास विभागाने सर्व जिल्हा परिषदांना दिल्या होत्या. त्यानुसार अनेक जिल्हा परिषदांनी आचारसंहितेपूर्वी बदली प्रक्रिया राबवून शिक्षकांना न्याय दिला. परंतु, पुणे जिल्हा परिषदेमध्ये समुपदेशन प्रक्रिया न राबविल्यामुळे बदलीच्या प्रतीक्षेत असलेल्या शिक्षकांमध्ये अस्वस्थता निर्माण झाली आहे.
ग्रामविकास विभागाने १७ मे २०२४ रोजी सर्व जिल्हा परिषदांना बदली प्रकिया राबविण्याबाबत सूचित केले आहे. या आदेशानुसार बदल्या जलदगतीने राबवून प्रतीक्षेत असलेल्या शिक्षकांना न्याय द्यावा, अशी मागणी जुन्नर तालुका शिक्षक समितीने पुणे जिल्हा परिषदेचे मुख्य कार्यकारी अधिकारी रमेश चव्हाण यांच्याकडे केली आहे.