खोडद, ता. १३ : महिला व बालकल्याण विभाग जिल्हा परिषद पुणे व डिसेंट फाउंडेशन पुणे यांच्यावतीने बोरी खुर्द (ता. जुन्नर) येथील गुरुवर्य एकनाथ गोविंद देव प्रशालेत किशोरवयीन मुली तसेच महिला यांच्यासाठी आरोग्यविषयक मार्गदर्शन शिबिराचे आयोजन केले होते, अशी माहिती प्रशालेचे मुख्याध्यापक शमशुद्दीन पटेल यांनी दिली.

यावेळी बोरी खुर्द गावच्या सामाजिक कार्यकर्त्या वैशाली संभाजी काळे, ग्रामपंचायत सदस्या पुष्पा बांगर, वनिता भोर व इतर महिला उपस्थित होत्या. जिल्हा परिषद प्राथमिक शाळा आणि प्रशालेतील सर्व मुली व महिला यांना आरोग्यसेविका उज्ज्वला गवळी यांनी लैंगिक, आरोग्य व कायदेविषयक मार्गदर्शन केले. अल्पवयीन मुले व मुली यांमध्ये निर्माण होणारे परस्पर आकर्षण व धोके, सामाजिक समस्या यामुळे भविष्यात निर्माण होणारे प्रश्‍न याबद्दल सचित्र अशी सविस्तर माहिती गवळी यांनी दिली. जिल्हा परिषद पुणे यांनी तयार केलेली मार्गदर्शन पुस्तिका मुलींना यावेळी दिली.

या कार्यक्रमासाठी डिसेंट फाउंडेशनचे अध्यक्ष जितेंद्र बिडवई, समन्वयक योगेश वाकचौरे, अभिषेक चुरगुडे यांचे सहकार्य लाभले. याप्रसंगी शाळेचे शिक्षक संजय धायबर, अमित शेटे, हर्षदा जाधव, सोनल जाधव, सेवक रवींद्र जाधव हे उपस्थित होते. मुख्याध्यापक पटेल यांनी प्रास्ताविक केले. उपशिक्षक विजय चव्हाण यांनी आभार मानले.