खोडद, ता.७ : जुन्नर तालुक्यात लंपी आजाराने डोके वर काढले आहे. सध्यातालुक्यात २३ जनावरे लंपी आजाराने बाधित आहेत. यापैकी ८ बैल, गायी १५ गायी आहेत. प्रादुर्भाव वाढू लागल्यामुळे पशुपालक शेतकरी पुन्हा एकदा धास्तावले आहेत.

लंपी आजार उपचार केल्याने पूर्णपणे बरा होतो. प्रतिबंधात्मक उपाययोजना आजारापासून जनावरांना वाचविण्यासाठी शेतकऱ्यांनी सतर्क राहावे, असे आवाहन जुन्नर पंचायत समितीचे पशुधन विकास व विस्तार अधिकारी डॉ.सागर परदेशी यांनी केले आहे.
आजाराची लागण झाल्यानंतर शर्यतीचे बैल पळण्यास कमी होतील, गायी दूध कमी देतील म्हणून काही शेतकरी लसीकरण करून घेण्यास टाळाटाळ करतात व त्यामुळे या आजाराचा प्रसार अधिक होतो.

लंपी डास आणि माश्यांच्या चावण्यामुळे पसरतो.ज्या संक्रमित जनावरांना माशा आणि डास चावतात त्यानंतर या माशा व डासांच्या मार्फत या आजाराचा प्रसार होतो.जनावरांना लंपीची लागण झाल्यापासून २१ दिवसांनी लक्षणे दिसू लागतात.

लंपी आजाराची लक्षणे
•अंगावर गाठी येणे.
•पायाला किंवा पोळीला सूज येणे.
•डोळ्यातून पाणी येणे.
•डोळे भुरके होणे.
•अंगात ताप असणे.

लम्पी स्किन डिसीज (एलएसडी) हा जनावरांमध्ये लम्पी स्किन डिसीज विषाणू (एलएसडीव्ही) मुळे होणारा विषाणूजन्य संसर्ग आहे. यात जनावरांना ताप येतो, त्वचेवर गाठी तयार होतात, दूध उत्पादन कमी होते, वजन कमी होते आणि वेळीच उपचार केले नाही तर अगदी मृत्यू देखील होतो.यासारखे धोके उद्भवतात.गोचीड गोमाशी यांची नियंत्रण केल्याने हा आजार टाळता येतो.
- डॉ.सागर परदेशी,पशुधन विकास अधिकारी विस्तार, पंचायत समिती, जुन्नर

अशी घ्या जनावरांची काळजी
•गोठ्यात अधिक स्वच्छता ठेवायला हवी.
•गोठ्यात हवा खेळती राहायला हवी.
•गोठ्यात माशा आणि डास येऊ नयेत यासाठी औषधांची वारंवार फवारणी करावी.
•गोठ्यात सकाळ संध्याकाळी कडू लिंबाच्या पाल्याचा धूर करावा.
•सर्वप्रथम आजारी असलेल्या जनावराला इतर जनावरांपासून वेगळे करावे.
•लंपीचा संसर्ग झाल्यानंतर जंतनाशक औषधांची मात्रा द्यावी.
•गोठ्याभोवती डास, माशा यांची उत्पत्ती होणार नाही याची काळजी घ्यावी.

पशुधन हे ग्रामीण भागातील शेतकऱ्यांचे उत्पन्न देणारे हक्काचे साधन आहे. शेतीपूरक व्यवसाय म्हणून पशुधनाकडे पाहिले जाते. किरकोळ जरी लक्षणे जाणवली तरी त्याकडे दुर्लक्ष न करता तत्काळ पशू वैद्यकीय चिकित्सकांशी संपर्क साधावा.
- डॉ.संतोष वायाळ, पशुवैद्यकीय चिकित्सक, हिवरेतर्फे नारायणगाव

01457