खोडद, ता. १७ : बिबट्याचा वावर मोठ्या प्रमाणात असल्याने बिबट्याला पकडण्यासाठी जुन्नर वनविभागाने हिवरेतर्फे नारायणगाव (ता. जुन्नर) येथील काळमजाई मळ्यात सोमवारी (ता. १७) पिंजरा लावला.
खोडद येथील कळमजाईमळ्यात मागील अनेक दिवसांपासून बिबट्याचा वावर आहे. अनेक शेतकऱ्यांनी सकाळी व सायंकाळच्या वेळी या भागात बिबट्याला मुक्तपणे संचार करताना पाहिले आहे. या परिसरात बिबट्याकडून पशुधनावर हल्ले होण्याच्या घटना वारंवार घडत आहेत. वनविभागाने या परिसरातील बिबट्यांचा बंदोबस्त करावा, अशी मागणी या परिसरातील शेतकऱ्यांकडून होत होती. ग्रामपंचायत सदस्य मनीष मोरडे यांनी जुन्नर वनविभागाकडे या ठिकाणी पिंजरा लावण्याची मागणी केली होती. त्यानुसार सोमवारी सकाळी वनरक्षक ज्ञानेश्वर पवार यांनी कळमजाई मळ्यात पिंजरा लावला. त्यासाठी मनीष मोरडे, रोहिदास नाडेकर, विकास भोर, श्रीकांत वायाळ यांनी मदत केली.