खोडद, ता. ११ : निमगाव (ता. जुन्नर) येथे श्री पांडुरंग ग्रामीण विकास प्रतिष्ठान संचलित दिलीप वळसे पाटील कला, वाणिज्य व विज्ञान महाविद्यालयात महात्मा फुले यांची जयंती साजरी करण्यात आली. या वेळी प्रतिष्ठानचे अध्यक्ष संदिपान पवार यांच्या हस्ते महात्मा फुले यांच्या प्रतिमेला पुष्पहार अर्पण करून अभिवादन करण्यात आले. या प्रसंगी पवार यांनी आपल्या मनोगतात सांगितले की, ‘‘शिक्षण हेच खरे परिवर्तनाचे साधन असून विद्यार्थ्यांनी ज्ञान, समता आणि मानवतेच्या मूल्यांना जोपासावे. महात्मा फुले यांचे विचार हे समाजाला दिशा देणारे दीपस्तंभ आहेत. विद्यार्थ्यांनी या विचारांना अंगीकारावे.’’ या कार्यक्रमाला महाविद्यालयाचे प्राचार्य प्रल्हाद शिंदे, सर्व प्राध्यापक, कर्मचारी उपस्थित होते.