दौंड, ता. १० : दौंड नगरपालिका कार्यालयाचे वरिष्ठ अधिकारी सतत रजेवर राहत असल्याचे चित्र आहे. नगरपालिका प्रशासनाने पावसाळ्यापूर्वी आणि पावसाळा सुरू झाल्यानंतरही नाममात्र गाळ काढण्याचे काम केल्याने थोड्या पावसातही रस्ते सांडपाण्याने वाहत आहेत. तसेच इतर अनेक समस्यांकडेही प्रशासनाचे दुर्लक्ष होत असल्याने नागरिक संतप्त आहेत.
नगरपालिका कार्यालयात वरिष्ठ अधिकारीच थांबत नसल्याने कनिष्ठ अधिकारी फक्त हजेरी लावून निघून जातात. नियोजनाचा अभाव आणि हलगर्जीपणामुळे कमी दाबाने दूषित पिण्याच्या पाण्याचा पुरवठा होतो. शहरात फक्त दर्शनी भागातच स्वच्छता केल्याचा आव आणला जात आहे. अन्य भागांमध्ये घंटागाडी आणि संबंधित कर्मचारी फिरकत देखील नाही. शहरातील पथदिवे बंद असतात आणि नादुरूस्त दिवे बदलण्याची मागणी करायची असल्यास संबंधित अधिकारी जागेवर नसतात. गटारी तुंबल्यावर तक्रार केल्यानंतर सवडीने दोन ते तीन दिवसानंतर नगरपालिकेच्या यंत्राने गाळ काढला जातो.
दौंड - गोपाळवाडी रस्ता, गजानन सोसायटी, सरपंच वस्ती, समतानगर, भीमनगर, साठेनगर, यादव वस्ती व अन्य भागांमध्ये थोड्या पावसानंतरच रस्त्यांवर पाणी तुंबत असल्याने नागरिकांना अडचणी येत आहेत. सर्व प्रमुख चौक आणि आतील रस्त्यालगतच्या गटारींवर पायऱ्या, ओटे, टपऱ्या, बेकायदा बांधकामे करण्यात आल्याने त्याखालील गाळ काढता येत नाही. त्यामुळे सांडपाणी आणि पावसाचे पाणी गटारीऐवजी मुख्य रस्त्यांवरून वाहत आहे. भाजी मंडई परिसरात तर गटारी तुंबल्याने सांडपाणी रस्त्यावरून वाहत बाजारतळाकडे जात आहे. नगरपालिकेच्या उपमुख्याधिकारी सुप्रिया गुरव यांना याबाबत विचारले असता त्या म्हणाल्या, मुख्याधिकारी रजेवर आहेत व मी प्रशिक्षणासाठी बाहेर आहे.