दौंड, ता. ३ : विधानसभा निवडणुकीसाठी मतदान करतानाचे व्हिडिओ चित्रीकरण केल्याप्रकरणी सोनवडी (ता. दौंड) येथील तरुणाविरुद्ध गुन्हा दाखल केला आहे. सोमनाथ मोहन पवार (रा. सोनवडी, ता. दौंड) याने मतदानाचा व्हिडिओ समाज माध्यमांवर प्रसारित करण्यात आला होता.
दौंड विधानसभा मतदारसंघाच्या निवडणुकीसाठी २० नोव्हेंबर रोजी झालेल्या मतदानाच्या दिवशी हा प्रकार घडला. सोनवडी येथील मतदान केंद्र क्रमांक २०५ मध्ये सोमनाथ याने बंदी असताना मोबाईल संच नेला होता. तसेच मतदान केंद्राध्यक्ष व कर्मचाऱ्याशी नजर चुकवून त्याने ज्या उमेदवारास मतदान केले त्याचे मोबाईल संचात व्हिडिओ चित्रीकरण केले. त्यानंतर त्याने या मतदानाचे व्हिडिओ स्वतःच्या नावाने असलेल्या खात्यावरून समाज माध्यमांवर प्रसारित केले.
दौंड पोलिस ठाण्यात हवालदार निखिल जाधव यांनी याप्रकरणी फिर्याद दिली आहे. फिर्यादीनुसार सोमनाथ याच्याविरुद्ध मतदानाची गुप्तता भंग केल्याप्रकरणी
गुन्हा दाखल करण्यात आला आहे.