दौंड, ता. ७ : दौंड शहरात दुचाकीवरून आलेल्या दोन चोरट्यांनी घरी परतणाऱ्या परिचारिकेच्या गळ्यातील सोनसाखळी हिसकावली आहे. ही घटना शहरातील डिफेन्स कॉलनी भागात घडली. दौंड पोलिस ठाण्यात सुनंदा ए. सोनवणे ( रा. डिफेन्स कॅालनी रस्ता, दौंड) यांनी फिर्याद दाखल केली आहे. सुनंदा सोनवणे या एका खासगी रूग्णालयात परिचारिका म्हणून नोकरीस आहेत. शनिवारी (ता. ४) सायंकाळी पावणेसहा वाजता सोनवणे या नेहमीप्रमाणे घरी पायी परतत होत्या. त्यावेळी काळ्या रंगाच्या दुचाकीवरून आलेल्या दोन चोरट्यांनी त्यांच्या गळ्यातील ३५ हजार रुपयांची सोनसाखळी हिसकावून पळ काढला. त्यानंतर भरधाव दुचाकीवरून दोघे पसार झाले. दोन्ही चोरट्यांचे अंदाजे वय ३० असल्याचे फिर्यादीत नमूद करण्यात आले आहे.