दौंड, ता. ७ : दौंड शहरात कत्तलीसाठी आणलेल्या चार गायींची सुटका झाली आहे. महाराष्ट्र आपत्कालीन प्रतिसाद प्रणाली अंतर्गत असणाऱ्या ११२ या क्रमांकावर या गायींविषयी माहिती पोलिसांना देण्यात आली होती. दौंड शहरातील नगर मोरी ते रेल्वे उड्डाण पुलाकडे जाणाऱ्या मार्गावरील शांताई हॅाटेलच्या मागे झुडपात चार जानेवारीला चार गायी कत्तलीसाठी बांधून ठेवण्यात आल्या होत्या. दौंड पोलिसांना ११२ या क्रमांकावरून माहिती मिळताच ते घटनास्थळी दाखल झाले. तेथे तीन जर्सी व एक गावरान, अशा एकूण चार गायी कत्तलीसाठी आणलेल्या होत्या. पोलिसांनी त्या गायींची सुटका केली. दौंड पोलिस ठाण्यात पोलिस अंमलदार नीलेश चव्हाण यांनी या प्रकरणी दाखल केलेल्या फिर्यादीनुसार वाहिद बाबुमिया खान (रा. दौंड) याच्याविरोधात गुन्हा दाखल केला आहे. वाहिद खान याच्याविरोधात महाराष्ट्र प्राणी संरक्षण अधिनियम आणि प्राण्यांचा छळ प्रतिबंधक अधिनियमातील कलमान्वये गुन्हा दाखल करण्यात आला. सदर गायींची एका गोशाळेत रवानगी करण्यात आली.