दौंड, ता. २७ : गोपाळवाडी (ता.दौंड) येथे नागरी भागातील उकिरड्यावर प्लॅस्टिक बरण्यांमध्ये आढळलेले मृत अर्भक व मानवी अवयव प्रकरणानंतर दौंड शहरातील भंगाळे हॅास्पिटलची नोंदणी रद्द करण्यात आली आहे. रुग्णालयाकडून तीन कायद्यांचा भंग झाल्याने चौकशीनंतर जिल्हा शल्यचिकित्सकांनी ही कारवाई केली आहे.
दौंड - कुरकुंभ राष्ट्रीय महामार्गालगत २५ मार्च रोजी जिजामाता नगर येथे प्लास्टिक बरण्यांमध्ये एक १८ ते २० आठवडे वय असलेले पुरुष जातीचे मृत अर्भक आढळले होते. अन्य बरण्यांमध्ये शस्त्रक्रिया दरम्यान काढलेले गर्भाशय, स्तन, वृषण, आदी मानवी अवयव संबंधितांच्या नावासह आढळले होते. शहरातील दौंड - सिध्दटेक अष्टविनायक मार्गावरील भंगाळे क्लिनिक अॅण्ड नर्सिंग होम या रूग्णालयाचे हे अर्भक व मानवी अवयव असल्याची माहिती दौंड पोलिसांच्या तपासात पुढे आली होती.

उकिरड्यावर अर्भक व मानवी अवयव सापडल्यानंतर जिल्हा शल्यचिकित्सक डॅा. एन. एस. यमपल्ले यांनी या रुग्णालयास भेट दिली असता त्यांना गंभीर त्रुटी आढळून आल्या होत्या. त्याबाबत रुग्णालयास नोटीस बजावून खुलासा मागविण्यात आला होता. परंतु खुलासा असमाधानकारक असल्याचे आदेशात नमूद करण्यात आले आहे. रुग्णालय प्रशासन व व्यवस्थापनाकडून शरीरशास्त्र कायदा १९४९, वैद्यकीय गर्भपात कायदा १९७१ व बॅाम्बे नर्सिंग होम अॅक्ट १९४९ चा भंग झाल्याचे आढळून आले होते. त्यानुसार रूग्णालयाची बॅाम्बे नर्सिंग होम अॅक्ट आणि वैद्यकीय गर्भपात कायद्याने झालेली रुग्णालयाची नोंदणी २१ मे रोजी रद्द करण्यात आली आहे, असे डॅा. एन. एस. यमपल्ले यांनी त्यांच्या आदेशात नमूद केले आहे.
नोंदणी रद्द करण्याच्या आदेशाविरुद्ध सार्वजनिक आरोग्य व कुटुंब कल्याण विभागाचे सचिव यांच्याकडे अपील करण्याकरिता रुग्णालयास एक महिन्याची मुदत देण्यात आली आहे.
दरम्यान, या प्रकरणात मृत अर्भक व अर्भकाच्या आई व वडिलांची डीऑक्सिरिबो न्यूक्लिक ॲसिड (डीएनए) ही आनुवंशिक चाचणी करण्याकरिता एप्रिल महिन्यात नमुने घेण्यात आले होते. चाचणीचा अहवाल प्रलंबित आहे.