दौंड, ता. २७ : दौंड शहरातील रेल्वे हद्दीत गांजा विक्री करणाऱ्या महिलेकडून एक किलो गांजा जप्त केला आहे. रस्त्याच्या कडेला गांजा विक्री होत असताना मध्य रेल्वेच्या पुणे विभागाकडून गांजा विक्रीप्रकरणी कोणतीही कारवाई केली नाही.
याबाबत दौंड पोलिसांनी माहिती दिली की, हुतात्मा चौकातून दौंड रेल्वे स्थानकाकडे जाणाऱ्या रस्त्यावर बेबी रूबेन राठोड (वय ६५, रा. भीमनगर, दौंड) ही महिला राजरोसपणे गांजा विक्री करत आहे. रेल्वे हद्दीत अतिक्रमण करून तिने खोली बांधून त्यामधून गांजा विक्री सुरू ठेवली होती. दौंड पोलिस ठाण्याचे उपनिरीक्षक रूपेश कदम यांच्यासह पोलिस पथकाने सोमवारी (ता. २६) कारवाई करून झोपडीतून प्लॅस्टिक पिशव्यांमध्ये भरलेला १ किलो ११ ग्रॅम गांजा जप्त केला.
या प्रकरणी पोलिस अंमलदार संजय कोठावळे यांनी दिलेल्या फिर्यादीनुसार बेबी राठोड हिच्याविरुद्ध अमली पदार्थ विरोधी कायद्यातील विविध कलमान्वये गुन्हा दाखल केला आहे. दरम्यान मंगळवारी (ता. २७) प्रकृती बिघडल्याने तिला उपचारासाठी रूग्णालयात दाखल केले. तिला गांजाचा पुरवठा करणाऱ्यांचा दौंड पोलिस शोध घेत आहेत.

अल्पवयीन ग्राहकांचा राबता
रेल्वेच्या हद्दीत खोलीत असलेल्या बेबी राठोड हिच्या गांजा अड्ड्यावर अल्पवयीन मुलांसह ज्येष्ठ नागरिक देखील नियमितपणे गांजा खरेदीसाठी येत असतात. अल्पवयीन मुले गांजाच्या पुड्या घेऊन तेथेच गांजा ओढत असतानाही रेल्वे प्रशासनाने कधी कारवाई केली नाही. रेल्वे मालमत्तेचे संरक्षण, प्रवासी आणि रेल्वे कर्मचारी सुरक्षा, रेल्वे परिसरातील अवैध कृत्यांवर लक्ष ठेवण्याची मुख्य जबाबदारी असलेल्या रेल्वे सुरक्षा दलाने (आरपीएफ) देखील रेल्वे हद्दीतील या अड्ड्यावर कधी कारवाई केलेली नाही.