दौंड, ता. १९ : दौंड शहरात पोलिसांनी केलेल्या कारवाईत ११५० किलो गोमांस जप्त करून एकाविरुद्ध गुन्हा दाखल केला आहे. बारा दिवसांपूर्वी याच ठिकाणी अडीचशे किलो गोमांस जप्त करण्यात आले होते.
शहरातील भीमा नदीकाठावर असलेल्या खाटीक गल्ली मध्ये सोमवारी (ता. १६) गोहत्या सुरू असल्याची माहिती मिळाल्यानंतर मानद पशू कल्याण अधिकारी अहिरेश्वर जगताप हे पोलिस पथकासह दाखल झाले. दौंड पोलिसांनी केलेल्या कारवाईत तेथे असिफ कासम कुरेशी (रा. खाटीक गल्ली, दौंड) हा गोहत्या करताना आढळून आला.
दौंड पोलिस ठाण्यात या प्रकरणी हवालदार अमीर शेख यांनी दिलेल्या फिर्यादीनुसार असिफ कासम कुरेशी याच्याविरूध्द गुन्हा दाखल केला आहे. या कारवाईत जप्त केलेल्या ११५० किलो गोमांसचे एकूण मूल्य १ लाख ८४ हजार रुपये इतके असल्याचे फिर्यादीत नमूद करण्यात आले आहे. जप्त केलेल्या गोमांसाचे पशू वैद्यकीय अधिकाऱ्यांच्या उपस्थितीत नमुने घेत राहिलेले गोमांस दौंड पोलिसांच्या उपस्थितीत नष्ट केले.
दरम्यान, दौंड शहरातील खाटीक गल्ली व इदगाह मैदान परिसरात २९ एप्रिल व ४ मे २०२५ रोजी पोलिसांनी केलेल्या कारवायांमध्ये एकूण २०५० किलो गोमांस जप्त करून सात जणांविरुद्ध गुन्हा दाखल केला होता. त्यानंतर ४ व १६ जून रोजी त्याच ठिकाणी करण्यात आलेल्या दोन कारवायांमध्ये एकूण १४०० किलो गोमांस जप्त करून एकूण चार जणांविरूध्द गुन्हा दाखल केले आहे.