दौंड, ता. १८ : दौंड पोलिस ठाण्यामागील फोटोलॅबमधील कर्मचाऱ्यास मारहाण करणाऱ्या दोन भावांना दौंड पोलिसांनी अटक केली आहे. फोटोलॅबमध्ये छपाईसाठी दिलेले छायाचित्र देण्यास उशीर झाल्याच्या रागापोटी ही मारहाण करण्यात आली होती.
दौंड पोलिस ठाण्याचे अंमलदार बापू रोटे यांनी या बाबत माहिती दिली. शहरातील हरिओम फोटोलॅब मधील कर्मचारी श्रीकांत अनिल घोडके ( वय ३४) यास छायाचित्र देण्यास उशीर झाल्याच्या रागापोटी दोन तरुणांनी ११ जून रोजी लाकडी दांडक्याने मारहाण केली होती. दौंड पोलिस ठाण्यात याप्रकरणी दोन अज्ञातांविरूध्द गुन्हा दाखल केला होता. श्रीकांत यास मारहाण करणाऱ्यांना अटक न झाल्याने १३ जून रोजी दौंड तालुका फोटोग्राफर संघटनेच्या वतीने घटनेचा निषेध करण्यात आला होता. दौंड पोलिसांकडे एका निवेदनाद्वारे कारवाई करण्याची मागणी करण्यात आली होती.
दरम्यान, दौंड पोलिसांनी मंगळवारी (ता. १७) निसार वाहिद खान (वय २४) याला अटक केली. तर बुधवारी (ता. १८) त्याचा भाऊ आरिफ वाहिद खान (वय २२, दोघे रा. खाटीक गल्ली, दौंड) पोलिस ठाण्यात हजर झाल्याने त्यालाही अटक करण्यात आली. हवालदार राहुल घाडगे पुढील तपास करीत आहेत.