दौंड, ता. २१ : दौंड रेल्वे स्थानकाच्या तिकीट खिडकीजवळ प्रवाशाला जखमी करून लुटणाऱ्या दोन तरुणांपैकी एका तरुणाला अटक करण्यात आली आहे. दौंड पोलिसांच्या एका पथकाने तातडीने हालचाल करीत एका चोरट्याचा पाठलाग करीत ही कारवाई केली.
याबाबत दौंड पोलिसांनी गुरुवारी (ता. २१) माहिती दिली की, दौंड रेल्वे स्थानकावरून सोलापूर येथे जाण्याकरिता आकाश इटकर (रा. लोहगाव, पुणे) हे १९ ऑगस्ट रोजी दौंड रेल्वे स्थानकाच्या आरक्षण केंद्रात तिकीट काढण्यासाठी आले होते. तिकीट काढून बाहेर पडल्यावर सायंकाळी साडेसहा वाजण्याच्या सुमारास दुचाकीवरून आलेल्या दोन तरूणांनी त्यांना पाठीमागून येऊन मारहाण केली. आकाश इटकर यांच्या तोंडावर बेदमरित्या मारहाण करून दोघांनी त्यांना जमिनीवर पाडले. त्यांच्याकडील ८० हजार रुपयांची रोकड असलेली सॅक बॅग हिसकावून ते पळाले.
दरम्यान आकाश इटकर यांनी तातडीने दोघांचा पाठलाग सुरू केला. त्याचबरोबर त्यांनी महाराष्ट्र आपत्कालीन प्रतिसाद प्रणाली अंतर्गत असणाऱ्या ११२ या क्रमांकावर पोलिसांना चोरीची माहिती दिली. दौंड पोलिस ठाण्याचे उप निरीक्षक रूपेश कदम, हवालदार सुभाष राऊत, नितीन बोराडे व अंमलदार पवन माने हे माहिती मिळताच घटनास्थळी दाखल झाले. त्यांनी संशयित आरोपीचे वर्णन घेत शोध मोहीम सुरू केली. दौंड- गोपाळवाडी रस्त्यावर त्यांना चोरलेल्या बॅगसह लक्ष्मण ऊर्फ लक्ष्या बच्च्या भोसले हा तरुण आढळून आल्याने त्याला घेरून ताब्यात घेण्यात आले. तर, दुसरा चोरटा पळून गेला होता.
याबाबत दौंड पोलिस ठाण्यात आकाश इटकर यांच्या फिर्यादीनुसार संशयित आरोपी लक्ष्मण बच्च्या भोसले (वय २१, रा. नानवीज, ता. दौंड) व त्याचा अंदाजे ३० ते ३२ वय असलेला अनोळखी साथीदार यांच्याविरोधात जबरी चोरीचा गुन्हा दाखल केला आहे. हवालदार नितीन बोराडे पुढील तपास करीत आहेत. बुधवारी (ता. २०) कायदेशीर सोपस्कार पूर्ण झाल्यानंतर आकाश इटकर यांना रोकडसह बॅग परत करण्यात आली.