दौंड, ता. २४ : सोनवडी (ता. दौंड) येथे आई व लहान भावावर चाकूने हल्ला करण्याचा प्रकार घडला आहे. याप्रकरणी थोरला मुलगा व सुनेविरुद्ध गुन्हा दाखल करण्यात आला आहे. सोनवडी येथील घोलपघर येथे शनिवारी (ता. २३) हा प्रकार घडला. तर दौंड पोलिसांनी रविवारी (ता. २४) याबाबत माहिती दिली.
दौंड पोलिस ठाण्यात संगीता सुरेश पवार यांच्या फिर्यादीनुसार सागर सुरेश पवार व त्याची पत्नी (दोघे रा. घोलपघर, सोनवडी, ता.दौंड) विरुद्ध गुन्हा दाखल करण्यात आला आहे. संगीता पवार यांना घराशेजारील नारळाची झाडे तोडलेली दिसल्याने त्याविषयी सुनेकडे विचारणा केली. बायकोला विचारणा केल्याच्या रागापोटी संगीता पवार यांचा मोठा मुलगा सागर सुरेश पवार याने आईला शिवीगाळ करीत मारहाण केली. ते पाहून धाकटा मुलगा कपिल पवार हा भांडणे सोडविण्यासाठी आला असता त्यालाही मारहाण करण्यात आली. दरम्यान, सागरने चाकूने आईच्या उजव्या हाताच्या दंडावर व धाकटा भाऊ सागर याच्या पाठीवर हल्ला करीत त्यांना जखमी केले. त्यानंतर जीवे मारण्याची धमकी दिली, असे फिर्यादीत नमूद करण्यात आले आहे.