दौंड, ता. २९ : मुंबई- सोलापूर सिद्धेश्वर एक्सप्रेसमधून प्रवास करणाऱ्या एका ज्येष्ठ नागरिकाचा १ लाख ८५ हजार रुपये मूल्य असलेला मोबाईल संच चोरीस गेला आहे. वातानुकूलित डब्यात ही चोरी झाली आहे.
बेंगळुरू येथील कुमार राडजा (वय ६३, रा. जे. पी. नगर, बेंगळुरू) हे रविवारी (ता. २४) सिद्धेश्वर एक्स्प्रेसने मुंबई ते सोलापूर असा प्रवास करीत होते. प्रवासाच्या दरम्यान मध्यरात्री एक ते पहाटे सव्वाचार वाजण्याच्या दरम्यान कुमार राडजा झोपेत असताना लोणावळा ते दौंड दरम्यान ही चोरी झाली. चोरीस गेलेल्या आयफोन १४ प्रो मॅक्स मोबाईल संचाचे मूल्य १ लाख ८५ हजार रुपये असल्याचे फिर्यादीत नमूद केले आहे. याबाबत कुमार राडजा यांनी ऑनलाइन तक्रार नोंदविल्यानंतर पुणे लोहमार्ग पोलिस दल मुख्यालयातून सदर चोरीचा गुन्हा तपासाकरिता दौंड लोहमार्ग पोलिस ठाण्यात वर्ग केला. दौंड लोहमार्ग पोलिस ठाण्यात या प्रकरणी २५ ऑगस्ट रोजी अज्ञात चोरट्याविरुद्ध चोरीचा गुन्हा दाखल केला आहे.