दौंड, ता. ४ : दौंड जंक्शन रेल्वे स्थानकावर एका प्रवाशाच्या पाठीत फरशी मारून मोबाईल व रोख रक्कम चोरण्यात आली आहे. बुधवारी (ता. ३) सायंकाळी पाच वाजता वर्दळीच्या वेळी हा प्रकार घडला.
कुलदीप मूलसिंग राजपूत (वय २९, रा. कल्याणनगर, जुळे सोलापूर, सोलापूर) असे जखमी प्रवाशाचे नाव आहे. याप्रकरणी राजपूत यांनी दौंड लोहमार्ग पोलिस ठाण्यात फिर्याद दिली आहे. फिर्यादीनुसार दोन अज्ञात तरुणांविरुद्ध चोरीचा गुन्हा दाखल केला आहे. अंदाजे २४ ते २५ वय असलेल्या दोन्ही तरुणांची दाढी, मिशा व डोक्यावरचे केस वाढलेले होते, असे फिर्यादीत नमूद केले आहे. राजपूत हे सोलापूर येथे जाण्यासाठी फलाट क्रमांक दोनवर प्रवासी गाडीची वाट पाहत होते. त्यावेळी दोन तरुण त्यांच्याकडे आले व तू इथे का बसला, आम्हाला पैसे दे, असे म्हणत शिवीगाळ करून मारहाण केली. पैसे देण्यास नकार देताच त्यापैकी एक तरुणाने फरशी हातात धरून ती डोक्यात मारण्याचा धाक दाखविला. दोघांनी राजपूत यांच्या खिशातील मोबाईल संच व रोख रक्कम, असा एकूण १६ हजार १०० रुपयांचा ऐवज बळजबरीने काढला. त्याला प्रतिकार करताना एकाने राजपूत यांच्या पाठीत फरशी मारल्यानंतर दोघे पळून गेले, असे फिर्यादीत नमूद केले आहे.

पंधरवड्यात दुसरा प्रकार
दौंड रेल्वे रेल्वे स्थानकाच्या आरक्षण केंद्रातील तिकीट खिडकीबाहेर १९ ऑगस्ट रोजी आकाश इटकर (रा. लोहगाव, पुणे) या प्रवाशाच्या तोंडावर बेदम मारहाण करून ८० हजार रुपयांची रोकड असलेली पिशवी घेऊन दोन चोरटे पळाले होते. त्यापैकी एक संशयित आरोपी लक्ष्मण बच्च्या भोसले (वय २१, रा. नानवीज, ता. दौंड) याला आकाश इटकर व दौंड पोलिसांनी पिशवीसह पकडले होते. त्यापैकी दुसरा संशयित अद्याप सापडलेला नाही.