दौंड , ता. ९ : शहरात गौरी गणपती आरास स्पर्धेत अनघा इनामदार यांनी पहिला तर स्वामिनी खानविलकर, ज्योती पासलकर यांनी अनुक्रमे द्वितीय, तृतीय क्रमांकाचा पुरस्कार पटकावला आहे.
दौंड शहरातील दिवंगत माजी आमदार बाळासाहेब जगदाळे पाटील प्रतिष्ठानच्या वतीने ही स्पर्धा घेण्यात आली होती. गणेशोत्सव काळात ज्येष्ठा-कनिष्ठांचे सोनपावलांनी आगमन झाल्यावर उत्तम सजावट आणि देखणी मांडणीसह आरास करणाऱ्या महिलांची या पुरस्कारासाठी निवड करण्यात आली. वृषाली फराटे, पवार व शीतल बोधे यांना उत्तेजनार्थ पुरस्कार देण्यात आले. उमा इंद्रजित जगदाळे यांच्या अध्यक्षतेखाली पारितोषिक वितरण करण्यात आले. विजेत्यांना सन्मानचिन्ह, पैठणी साडी व रोख रक्कम देऊन गौरविण्यात आले. परीक्षक म्हणून पल्लवी सूर्यवंशी, सुजाता मावकर, राजश्री कदम व कांचन देसाई यांनी काम पाहिले. पारितोषिक वितरण कार्यक्रमास पुणे जिल्हा माध्यमिक व उच्च माध्यमिक शाळा मुख्याध्यापक संघाचे अध्यक्ष प्रसाद गायकवाड, आदिनाथ थोरात, डॅा. सुरेखा भोसले, माजी नगरसेविका अनिता दळवी, शैलजा सरनोत, प्रतिष्ठानचे अध्यक्ष महेंद्र देसाई, सचिव संजय फराटे, आदी उपस्थित होते.